ក្រុមហ៊ុនផលិតបន្ទះឈីប Intel បានប្រកាសពីការពន្យារពេលបញ្ចប់គម្រោងសាងសង់រោងចក្រ តម្លៃប្រមាណ ២០ពាន់លានដុល្លារ នៅរដ្ឋ Ohio នៃសហរដ្ឋអាមេរិក ក្រោមហេតុផលថា ទីផ្សារបន្ទះឈីបកំពុងមានកំណើនយឺត។
យោងតាមការចុះផ្សាយពីគេហទំព័រ Wall Street Journal បានបង្ហាញថា ផែនការដំបូងរបស់ Intel គឺគ្រោងចាប់ផ្ដើមផលិតបន្ទះឈីបនៅរោងចក្រក្នុងរដ្ឋ Ohio ពីឆ្នាំក្រោយទៅ ក៏ប៉ុន្តែក្រុមហ៊ុនបានលើកពេលបញ្ចប់គម្រោងរហូតដល់ចុងឆ្នាំ២០២៦ វិញ។
គួសបញ្ជាក់ដែរថា ផែនការពន្យារពេលគម្រោងសាងសង់រោងចក្រតម្លៃ ២០ពាន់លានដុល្លារ របស់ក្រុមហ៊ុន Intel កើតឡើងបន្ទាប់ពីក្រុមហ៊ុនចាប់ផ្ដើមងាកទៅចំណាយ លើការស្រាវជ្រាវបច្ចេកវិទ្យា AI ដែលកំពុងពេញនិយមវិញ ស្របពេលក្រុមហ៊ុនគូប្រជែងដូចជា Nvidia និង Advanced Micro Devices គឺកំពុងនាំមុខ Intel លើវិស័យបច្ចេកវិទ្យា AI ស្រាប់។
ជម្រាបបន្ថែមថា ដោយសារតម្រូវការបន្ទះឈីបនាពេលបច្ចុប្បន្ន ហាក់មិនមានសន្ទុះខ្លាំង ដូច្នេះហើយក្រុមហ៊ុនអាមេរិកមួយនេះ ក៏បានព្យាករពីប្រាក់ចំណូលប្រចាំត្រីមាសទីមួយរបស់ខ្លួន ថានឹងមានការថយចុះផងដែរ៕
