ក្រុមហ៊ុន SpaceX របស់មហាសេដ្ឋី Elon Musk បានដាក់លិខិតស្នើប្ដូរទីតាំងក្រុមហ៊ុន ពីរដ្ឋ Delaware ទៅរដ្ឋតិចសាស់វិញ បន្ទាប់ពីតុលាការរដ្ឋ Delaware លុបចោលកញ្ចប់ទឹកប្រាក់ប្រមាណ ៥៥ពាន់លានដុល្លារ ដែលមហាសេដ្ឋីអាមេរិក ត្រូវទទួលបានពីក្រុមហ៊ុន Tesla។
យោងតាមការចុះផ្សាយពីគេហទំព័រ Businessinsider បានបង្ហាញថា CEO ក្រុមហ៊ុន SpaceX រូបនេះ បានធ្វើការរិះគន់យ៉ាងចាស់ដៃជាសាធារណៈ ទៅកាន់ការសម្រេចចិត្តរបស់តុលាការរដ្ឋ Delaware ដោយបានបង្ហោះសារលើបណ្ដាញសង្គម X ថា SpaceX នឹងប្ដូរមូលដ្ឋានពីរដ្ឋ Delaware ទៅកាន់រដ្ឋតិចសាស់ ហើយលើកទឹកចិត្តឲ្យគ្រប់ក្រុមហ៊ុនដែលមានប្រតិបត្តិការនៅរដ្ឋ Delaware គួរពិចារណា ប្ដូរទីតាំងឲ្យលឿនតាមដែលអាចធ្វើទៅបាន។
គួសបញ្ជាក់ដែរថា មិនមែនតែក្រុមហ៊ុន SpaceX ឡើយ ដែលសម្រេចប្ដូរមូលដ្ឋានទៅកាន់រដ្ឋថ្មី ពោលកន្លងមក Elon Musk ក៏បានប្ដូរទីតាំងក្រុមហ៊ុន Neuralink ពីរដ្ឋ Delaware ទៅកាន់រដ្ឋ Nevada ផងដែរ។
សូមជម្រាបដែរថា ក្រុមហ៊ុនធំៗរបស់មហាសេដ្ឋី Elon Musk សុទ្ធតែធ្លាប់តាំងមូលដ្ឋាននៅរដ្ឋ Delaware ដូចជា Tesla, SpaceX និង Neuralink ជាដើម ហើយមហាសេដ្ឋីរូបនេះក៏មានបំណងប្ដូរទីតាំងក្រុមហ៊ុនទាំងអស់ចេញពីរដ្ឋមួយនេះ ក្រោយមានរឿងរកាំរកូសជាមួយតុលាការប្រចាំតំបន់ ក៏ប៉ុន្តែក្រុមហ៊ុន Tesla អាចនឹងមានផលវិបាកក្នុងការប្ដូរមូលដ្ឋាន ដោយសារវាបានចុះបញ្ជីជាក្រុមហ៊ុនសាធារណៈ ខុសពី SpaceX និង Neuralink ដែលចុះបញ្ជីជាក្រុមហ៊ុនឯកជន៕
