សភាហុងគ្រីបោះឆ្នោតជ្រើសតាំងប្រធានតុលាការធម្មនុញ្ញឲ្យធ្វើជាប្រធានាធិបតី

កាលពីថ្ងៃទី២៦ ខែកុម្ភៈ សភានៃប្រទេសហុងគ្រីបានធ្វើការបោះឆ្នោតជ្រើសរើសយកលោក Tamas Sulyok ដែលមានតួនាទីជាប្រធានតុលាការធម្មនុញ្ញ មកឡើងធ្វើជាប្រធានាធិបតីនៃប្រទេសហុងគ្រី បន្ទាប់ពីលោកស្រី Katalin Novak ប្រកាសលាលែងចេញពីតំណែងកាលពីពីរសប្តាហ៍មុន។

យោងតាមសារព័ត៌មាន Reuters បានចុះផ្សាយថា លោក Sulyok ត្រូវបានគេរំពឹងថានឹងចូលកាន់តំណែងនៅថ្ងៃទី៥ ខែមីនា ខណៈដែលលោកបាននិយាយនៅក្នុងសេចក្តីថ្លែងការណ៍មួយបន្ទាប់ពីការបោះឆ្នោតតែងតាំងថា៖ គ្រាន់តែជាមេធាវី ក៏ដូចជាប្រធានធិបតីនៃសាធារណរដ្ឋអញ្ចឹង ខ្ញុំអាចបម្រើផលប្រយោជន៍សាធារណៈបានល្អបំផុត និងឈរលើគោលការណ៍សម្រាប់ឯកភាពជាតិ ដោយប្រកាន់យកនូវតម្លៃជាមូលដ្ឋាននៃច្បាប់។

គួរជម្រាបថាលោក Sulyok មានតួនាទីជាប្រធានតុលាការកំពូលរបស់ប្រទេសហុងគ្រីចាប់តាំងពីឆ្នាំ២០១៦ មកម្លេះ ដែលជាអាណត្តិដែលគាត់ទទួលបានការគាំទ្រពីសមាជិកសភាមកពីគណបក្សកាន់អំណាច Fidesz ។

ជាមួយគ្នានោះ ពាក់ព័ន្ធទៅនឹងការសម្រេចចិត្តលាលែងពីតំណែងរបស់លោកស្រី Novak យ៉ាងដូច្នេះ កើតឡើងដោយសារតែលោកស្រីកំពុងមានសម្ពាធផ្លូវចិត្តកាន់តែខ្លាំងទៅៗ ចំពោះអ្វីដែលខ្លួនបានលើកលែងទោសទៅដល់បុរសម្នាក់ ដែលត្រូវបានកាត់ទោសពីបទជួយបិទបាំង ការរំលោភបំពានផ្លូវភេទនៅក្នុងផ្ទះរបស់កុមារ៕