កាលពីពេលថ្មីនេះ លោក Yohan Poonawalla មហាសេដ្ឋីឥណ្ឌា និងជាអ្នកស្រលាញ់រថយន្តទំនើបៗ បានសម្រេចចិត្តចូលរួមការដេញថ្លៃរថយន្ត Rang Rover មួយគ្រឿងរបស់អតីតម្ចាស់ក្សត្រី Queen Elizabeth II ដែលបានចូលទិវង្គតកាលពីឆ្នាំ២០២២។
យោងតាមការចុះផ្សាយពីគេហទំព័រ CarToq បានបង្ហាញថា រថយន្តម៉ាក Rang Rover SDV8 សេរីឆ្នាំ២០១៦ របស់អតីតម្ចាស់ក្សត្រីចក្រភពអង់គ្លេស ត្រូវបានបង្ហាញវត្តមាននៅក្នុងកម្មវិធីដេញថ្លៃរថយន្តមួយ ក្នុងតម្លៃដេញថ្លៃចាប់ពីជាង ២សែនដុល្លារ ក៏ប៉ុន្តែមហាសេដ្ឋីឥណ្ឌា Poonawalla បានក្លាយជាម្ចាស់រថយន្តមួយនេះ ដោយមិនបង្ហាញពីទំហំចំណាយដើម្បីឈ្នះការដេញថ្លៃឡើយ។
អ្នកជំនួញខ្នាតយក្សរូបនេះ បានប្រាប់បណ្ដាញសារព័ត៌មានថា ចំណុចពិសេសរបស់រថយន្ត Rang Rover មួយគ្រឿងនេះ គឺស្លាកលេខរបស់វា ដ្បិតគ្រប់រថយន្តដែលប្រើនៅក្នុងរាជវាំង តម្រូវឲ្យផ្លាស់ប្ដូរស្លាកលេខ ក៏ប៉ុន្តែ Rang Rover មួយគ្រឿងនេះបំពាក់ស្លាកលេខ OU16 X V H គ្រប់ពេលដែលម្ចាស់ក្សត្រីប្រើប្រាស់វា។
ចំណុចពិសេសផ្សេងទៀត ដែលរថយន្តមួយគ្រឿងនេះមានលក្ខណៈខុសប្លែកពីគេគឺ ការកែច្នៃសឹងតែពេញមួយតួរថយន្ត ដើម្បីស្របតាមតម្រូវការរបស់ម្ចាស់ក្សត្រី Queen Elizabeth II ដូចជា ការផ្លាស់ប្ដូរចង្កៀងខាងមុខ ការបំពាក់បន្ថែមនូវឈ្នាន់ និងបង្កាន់ដៃ ដើម្បីផ្ដល់ភាពងាយស្រួលដល់ការឡើងចុះរថយន្ត ក៏ដូចជាភ្លើងសារ៉ែនដែលមាននៅក្នុងរថយន្តជាដើម។
សូមជម្រាបបន្ថែមថា លោក Poonawalla បានបញ្ជាក់ប្រាប់ថា លោកគ្មានបំណងប្រើប្រាស់រថយន្ត Rang Rover មួយគ្រឿងនេះទេ ដោយចង់បានវាមកដាក់តាំងបង្ហាញ ជាមួយរថយន្តប្រណីតៗផ្សេងទៀត ដែលមានស្រាប់ក្នុងផ្ទះ ហើយម្យ៉ាងទៀតវាធ្លាប់ជាយានជំនិះរបស់ម្ចាស់ក្សត្រីថែមទៀត ដូច្នេះការដែលទិញរបស់មានតម្លៃបែបនេះបាន វាគឺជារឿងកម្រខ្លាំងណាស់៕
