Samsung ទំនងកើបប្រាក់ចំណេញច្រើនបំផុត ក្នុងរយៈពេល ៦ត្រីមាសចុងក្រោយ

ក្រុមហ៊ុន Samsung Electronics កំពុងមានក្ដីរំពឹងទុកខ្ពស់ថា នឹងអាចប្រកាសពីប្រាក់ចំណេញខ្ពស់បំផុត នាត្រីមាសទីមួយនាពេលខាងមុខ ខណៈវាក៏នឹងក្លាយជាកំណត់ត្រាខ្ពស់បំផុតមួយ ក្នុងរយៈពេល ៦ត្រីមាសចុងក្រោយផងដែរ។

យោងតាមការចុះផ្សាយពីសារព័ត៌មាន Reuters បានបង្ហាញថា អ្នកជំនាញមកពីវិទ្យាស្ថាន LSEG SmartEstimate ២៧រូបបានអះអាងថា ប្រាក់ចំណេញរបស់ក្រុមហ៊ុន​ផលិតបន្ទះឈីបធំជាងគេលោក នាត្រីមាសទីមួយ ក្នុងឆ្នាំ២០២៤ នឹងអាចកើនដល់ចំនួន ៥,៧ទ្រីលានវ៉ុន ឬប្រហែល ៤,២៤ពាន់លានដុល្លារ ស្របពេលតម្លៃបន្ទះឈីបកំពុងឡើងថ្លៃកប់ពពក។

បើសិនជាការសន្និដ្ឋានខាងលើក្លាយជាការពិត នោះវានឹងក្លាយជាប្រាក់ចំណេញខ្ពស់បំផុត គិតចាប់តាំងពីត្រីមាសទីបី នៃឆ្នាំ២០២២ ហើយវាមានចំនួនច្រើនជាងរហូតដល់ ៩ដង បើធៀបនឹងប្រាក់ចំណេញត្រីមាសទីមួយ កាលពីឆ្នាំមុន។

សូមជម្រាបដែរថា មូលហេតុដែលអាចជំរុញឲ្យក្រុមហ៊ុនខ្នាតយក្សកូរ៉េខាងត្បូង ទំនងកើបប្រាក់​ចំណេញកប់ក្ដោង ដោយសារតែតាំងពីបើកទំព័រឆ្នាំ២០២៤ តម្រូវការបន្ទះឈីបមានខ្ពស់ខ្លាំង ស្របពេលតម្លៃវិញក៏ឡើងថ្លៃ រហូតដល់ ២០% បណ្ដាលឲ្យក្រុមហ៊ុនរកស៊ីលើវិស័យមួយនេះ កើបលុយបានច្រើនហូរហៀរ៕