បញ្ជូនខ្លួនសេដ្ឋីវៀតណាមមួយរូបទៅតុលាការ ជុំវិញករណីឆបោកទឹកប្រាក់ជាង ៤០លានដុល្លារ

លោក Tran Qui Thanh ប្រធានក្រុមហ៊ុនផលិតភេសជ្ជៈឈានមុខគេនៅវៀតណាម គឺក្រុមហ៊ុន Tan Hiep Phat និងកូនស្រីចំនួន ២រូប កំពុងត្រូវបានបញ្ជូនខ្លួនទៅកាន់តុលាការ ក្រោយរងការចោទប្រកាន់ ទាក់ទងនឹងករណីរំលោភទំនុកចិត្ត និងឆបោកទឹកប្រាក់ប្រមាណ ៤១លានដុល្លារ។ នេះបើតាមការចុះផ្សាយពីសារព័ត៌មាន VNExpress។​

ក្នុងករណីរកឃើញថា ឪពុកកូន ៣រូបនេះ ពិតជាបានប្រព្រឹត្តអំពើឆបោកនេះមែន អ្នកទាំង៣ នឹងប្រឈមមុខ ជាមួយការផ្ដន្ទាទោសជាប់ពន្ធនាគារចន្លោះពី ១២ ទៅ ២០ឆ្នាំ។

រំលឹកបន្តិចថា ចន្លោះខែមករា ឆ្នាំ២០១៩ រហូតដល់ខែវិច្ឆិកា ឆ្នាំ២០២០ ឪពុកកូន ៣រូបនេះ បានផ្ដល់ប្រាក់កម្ចីទៅកាន់មនុស្សជាច្រើន ជាមួយអត្រាការប្រាក់ ៣% ប្រចាំខែ តែជំនួសឲ្យកិច្ចសន្យាខ្ចីប្រាក់ ពួកគេបែរជាបន្លំធ្វើកិច្ចសន្យាទិញវត្ថុបញ្ចាំក្នុងតម្លៃទាបជាងទីផ្សារ ពីកូនបំណុលទៅវិញ។

បើទោះជាកូនបំណុលខ្លះ បានសងប្រាក់ទាំងដើមទាំងការក៏ដោយ តែលោក Thanh នៅតែរកលេសផ្សេងៗ មិនព្រមឲ្យវត្ថុបញ្ចាំទៅកាន់កូនបំណុលវិញនោះឡើយ ដោយអះអាងថា កូនបំណុលបានល្មើសកិច្ចសន្យា ដូច្នេះមិនអាចទទួលវត្ថុបញ្ចាំបានវិញឡើយ។

សូមជម្រាបដែរថា សំណុំរឿងមួយនេះត្រូវតុលាការលើកមកកាត់ក្ដីពីថ្ងៃទី២៣ ខែមេសា រហូតដល់ថ្ងៃទី២៥ ខែមេសាខាងមុខ ខណៈឪពុកកូន ៣រូបនេះ បានច្រានចោលរាល់ការចោទប្រកាន់ខាងលើ ស្របពេលការស៊ើបអង្កេតកំពុងមានការមមាញឹកជាខ្លាំង៕