ស្ថាបនិក និងជាប្រធានក្រុមហ៊ុនលំដាប់កំពូល Vingroup លោក Pham Nhat Vuong បានក្លាយជាជនជាតិវៀតណាមដំបូងគេបំផុត ដែលមានទ្រព្យសម្បត្តិសរុបចំនួន ៩ពាន់លានដុល្លារ ដោយផ្នែកតាមការចេញផ្សាយចុងក្រោយមួយរបស់ទស្សនាវដ្តី Forbes ថ្ងៃទី៨ ខែឧសភា។
ជុំវិញការកើនឡើងនៃទ្រព្យសម្បត្តិដ៏ច្រើលើសលប់នេះ បានធ្វើឲ្យលោក Vuong ជាប់នៅចំណាត់ថ្នាក់ទី ៣៣០ ក្នុងចំណោមបុគ្គលមានទ្រព្យសម្បត្តិច្រើនជាងគេបំផុតនៅទូទាំងពិភពលោក។
គួរឲ្យដឹងថា ការកើនឡើងគួរឲ្យកត់សម្គាល់នៃទ្រព្យសម្បត្តិរបស់ Vuong នេះ គឺភាគច្រើនដោយសារតែការកើនឡើងនៃតម្លៃភាគហ៊ុនរបស់ក្រុមហ៊ុនមេ Vingroup ដែលមានការហក់ឡើងឡើងយ៉ាងខ្លាំង បន្ទាប់ពីការអភិវឌ្ឍនាពេលថ្មីនេះ។
កត្តាសំខាន់សម្រាប់កំណើននេះ គឺបានមកពីការប្រកាសរបស់ Vinpearl ដែលជាក្រុមហ៊ុនបុត្រសម្ព័ន្ធដ៏ធំមួយរបស់ Vingroup ទៅលើកាលបរិច្ឆេទចំពោះការបោះផ្សាយលក់ IPO របស់ខ្លួន។ ជាលទ្ធផល តម្លៃភាគហ៊ុនរបស់ក្រុមហ៊ុនមេ Vingroup បានកើនឡើងជាបន្តបន្ទាប់ ដោយឈានដល់កម្រិតខ្ពស់បំផុត ក្នុងរយៈពេលជិតបីឆ្នាំចុងក្រោយ គិតចាប់តាំងពីខែមិថុនា ឆ្នាំ២០២២ មក។
ជម្រាបជូនថា នៅក្នុងត្រីមាសទី១ ប្រាក់ចំណូលសុទ្ធរួមរបស់ក្រុមហ៊ុន Vingroup ឈានដល់ជាង ៨៤ទ្រីលានដុង ពោលគឺបានកើនឡើងគួរឲ្យកត់សម្គាល់ ២៨៧% បើធៀបនឹងរយៈពេលដូចគ្នាក្នុងឆ្នាំ២០២៤។ហើយក្រុមហ៊ុនក៏សម្រេចបាននូវប្រាក់ចំណេញបន្ទាប់ពីបង់ពន្ធ ដល់ចំនួន ២,២៤ទ្រីលានដុង ផងដែរ ពោលគឺបានកើនឡើង ៦៨% ធៀបទៅនឹងឆ្នាំមុន។ កំណើននេះ ត្រូវបានជំរុញដោយលទ្ធផលដ៏រឹងមាំនៅក្នុងវិស័យផលិតកម្មឧស្សាហកម្ម ក៏ដូចជាការអភិវឌ្ឍន៍អចលនទ្រព្យ និងការជួញដូរ ជាដើម៕
