ក្រុមហ៊ុនបញ្ញាសិប្បនិម្មិត xAI របស់មហាសេដ្ឋីមានដាច់គេលើលោក Elon Musk បានប្តឹងបុរសម្នាក់មកពីរដ្ឋ South Carolina ដែលត្រូវបានចាប់ខ្លួនកាលពីដើមឆ្នាំនេះ ពីបទកេងប្រវ័ញ្ចផ្លូវភេទលើអនីតិជន ដោយចោទប្រកាន់ថា បុគ្គលរូបនេះបានប្រើប្រាស់បច្ចេកវិទ្យា AI របស់កម្មវិធី Grok ដើម្បីបង្កើតរូបភាពអាសអាភាសក្លែងក្លាយ ‘deepfakes’ ។ នេះបើតាមការចុះផ្សាយពីសារព័ត៌មាន CNA។
នៅក្នុងបណ្តឹងនោះ ក្រុមហ៊ុន xAI បានចោទប្រកាន់ថា លោក Harwood បានបង្ហោះរូបភាពរបស់មនុស្សពេញវ័យ និងអនីតិជនទៅកាន់កម្មវិធី Grok ហើយបានព្យាយាមប្រើប្រាស់ប្រព័ន្ធ AI ដើម្បីបង្កើតរូបភាពអាសអាភាសក្លែងក្លាយ ដោយផ្អែកលើរូបភាពទាំងនោះ។
ក្រុមហ៊ុន xAI បានចោទប្រកាន់នៅក្នុងបណ្តឹងដែលបានដាក់ជូនតុលាការសហព័ន្ធនៅរដ្ឋ Texas កាលពីថ្ងៃអង្គារថា លោក Terry Harwood បានរំលោភលើលក្ខខណ្ឌនៃសេវាកម្មរបស់ក្រុមហ៊ុន។ សំណុំរឿងនេះគឺជាសំណុំរឿងមួយក្នុងចំណោមសំណុំរឿងដំបូងដែលក្រុមហ៊ុន AI បានប្តឹងប្រឆាំងនឹងអ្នកប្រើប្រាស់ម្នាក់របស់ខ្លួន ពីបទប្រើប្រាស់ប្រព័ន្ធ AI ដើម្បីបង្កើតជារូបភាព ឬវីដេអូអាសអាភាស។
យ៉ាងណាមិញ ខាងក្រុមហ៊ុនរបស់មហាសេដ្ឋី Elon Musk បានស្នើសុំតុលាការសម្រាប់ចំនួនទឹកប្រាក់សំណងដែលមិនបានបញ្ជាក់ និងដីការបស់តុលាការដែលរារាំង លោក Harwood ពីការប្រើប្រាស់កម្មវិធី Grok ជាអចិន្ត្រៃយ៍ផងដែរ។
គួរជម្រាបជូនថា បណ្តឹងរបស់ក្រុមហ៊ុន xAI ប្រឆាំងនឹងលោក Harwood បានកើតឡើងបន្ទាប់ពីការត្រួតពិនិត្យយ៉ាងម៉ត់ចត់ជាសកលរបស់ xAI លើការចោទប្រកាន់ថាកម្មវិធី Grok បានអនុញ្ញាតឱ្យអ្នកប្រើប្រាស់បង្កើតវីដេអូក្លែងក្លាយផ្លូវភេទដែលមិនមានការព្រមព្រៀងគ្នា ឬវីដេអូដែលមើលទៅដូចការពិតដែលផលិតដោយ AI៕
