ប្រធានាធិបតីអាមេរិក លោក ដូណាល់ ត្រាំ កាលពីពេលថ្មីៗនេះ បានព្រមានថាក្រុមហ៊ុន Apple ត្រូវតែបង់ពន្ធអប្បរមា ២៥% ទៅលើទូរស័ព្ទ iPhone ដែលផលិតនៅក្រៅទឹកដីសហរដ្ឋអាមេរិក។ នេះបើតាមការចុះផ្សាយពីសារព័ត៌មាន CNBC។
ជុំវិញព័ត៌មានលើនេះ ត្រូវបានចែករំលែកដោយលោក ត្រាំ នៅលើបណ្តាញសង្គម Truth Social របស់ខ្លួន កាលពីថ្ងៃទី២៣ ខែឧសភា។ លោក ត្រាំ បាននិយាយថា លោកបានប្រាប់ទៅកាន់នាយកប្រតិបត្តិរបស់ក្រុមហ៊ុន Apple លោក Tim Cook តាំងពីយូរណាស់មកហើយ អំពីបំណងរបស់លោក ដោយចង់ឲ្យគ្រប់ទូរស័ព្ទ iPhone ដែលលក់នៅសហរដ្ឋអាមេរិក ត្រូវតែផលិត និងដំឡើងនៅក្នុងប្រទេស មិនមែននាំយកមកពីឥណ្ឌា ឬប្រទេសណាមួយផ្សេងទៀតនោះឡើយ។
ប្រធានាធិបតីអាមេរិករូបនេះ ក៏បានសង្កត់ធ្ងន់បន្ថែមទៀតថា ប្រសិនបើផលិតផលរបស់ Apple មិនមែនផលិតនៅក្នុងសហរដ្ឋអាមេរិកទេនោះ ពួកគេនឹងត្រូវរងពន្ធអប្បបរមា ២៥% ។
ជម្រាបជូនផងដែរថា ភាគហ៊ុនរបស់ក្រុមហ៊ុន Apple បានធ្លាក់ចុះជាង ២% នៅក្នុងការជួញដូរចុងក្រោយ បន្ទាប់ពីការប្រកាសរបស់លោក ត្រាំ នេះ។ បច្ចុប្បន្នក្រុមហ៊ុន Apple ធ្វើការផលិតភាគច្រើននៅក្នុងប្រទេសចិន ប៉ុន្តែក៏បានផ្លាស់ប្តូរទីកន្លែងផលិតកម្មរបស់ខ្លួនមួយចំនួន ទៅកាន់ប្រទេសឥណ្ឌាវិញផងដែរ ដោយសារតែទីនោះមានទំនាក់ទំនងមិត្តភាពជាមួយសហរដ្ឋអាមេរិក ល្អជាងចិន៕
