ប្រធានាធិបតីអាមេរិក លោក ដូណាល់ បាននិយាយថា ទំនាក់ទំនងរវាងលោក ជាមួយមហាសេដ្ឋីមានដាច់គេលើលោក Elon Musk នៅតែអាចផ្សះផ្សាវិញបាន បន្ទាប់ពីមានជម្លោះពាក្យសម្តីដ៏ក្តៅគគុក កាលពីពេលថ្មីៗនេះ។ នេះបើតាមការចុះផ្សាយពីសារព័ត៌មាន AP។
នៅក្នុងបទសម្ភាសជាមួយកម្មវិធី “Pod Force One” ដែលចុះផ្សាយដោយកាសែត New York Post កាលពីថ្ងៃទី១១ ខែមិថុនា ប្រធានាធិបតីអាមេរិកលោក ត្រាំ ត្រូវបានសួរថាតើទំនាក់ទំនងរបស់លោកអាចផ្សះផ្សាជាមួយមហាសេដ្ឋី Elon Musk វិញបានទេ បន្ទាប់ពីមានសង្គ្រាមពាក្យសម្តីកាលពីសប្តាហ៍មុន។
លោក ត្រាំ បាននិយាយថា ៖”ខ្ញុំគិតថាខ្ញុំអាចធ្វើបាន ប៉ុន្តែអ្នកដឹងទេថា យើងត្រូវគិតរឿងប្រទេសជាតិជាមុនសិន។ ការងារតែមួយគត់របស់ខ្ញុំនៅពេលនេះ គឺធ្វើឲ្យប្រទេសនេះត្រលប់មកឈរលើមូលដ្ឋានខ្ពស់ជាងអ្វីដែលយើងធ្លាប់មាន។ ខ្ញុំគិតថាយើងអាចធ្វើវាបាន។ ខ្ញុំគិតថាយើងនឹងធ្វើវាបានយ៉ាងងាយស្រួល” ។
លើសពីនេះ នៅពេលសួរថាតើលោកអាចអត់ឱនទោសដល់ Elon Musk បានទេ ប្រធានាធិបតីលោក ត្រាំ បានទទូចថាទៀតថា លោកមិនមានការខឹងសម្បារអ្វីចំពោះបញ្ហានេះនោះទេ ប៉ុន្តែបានសង្កត់ធ្ងន់ថា លោកហាក់មានការភ្ញាក់ផ្អើល និងខកចិត្ត ដែលទទួលបានការរិះគន់ជាសាធារណៈ ពីសំណាក់អតីតទីប្រឹក្សាជាន់ខ្ពស់របស់ខ្លួនបែបនេះ។
ជម្រាបជូនថា ជុំវិញបទសម្ភាសរបស់លោក ត្រាំ នេះ ត្រូវបានធ្វើឡើង នៅត្រឹមតែប៉ុន្មានម៉ោងប៉ុណ្ណោះ បន្ទាប់ពី លោក Musk បានបង្ហោះសារនៅលើបណ្តាញសង្គម X របស់ខ្លួន ដោយបង្ហាញការសោកស្តាយខ្លាំង ចំពោះការបញ្ចេញមតិរិះគន់ធ្ងន់ៗ ទៅលើប្រធានាធិបតីអាមេរិក៕
