ក្រុមហ៊ុនផលិតរថយន្តខ្នាតយក្សរបស់ជប៉ុន Honda ប្រកាសប្រមូលរថយន្តរបស់ខ្លួនជាង ២៥៩ ០០០ គ្រឿងនៅទូទាំងសហរដ្ឋអាមេរិក មកជួសជុលវិញ ដោយសារតែបញ្ហាឈ្នាន់ហ្វ្រាំង ដែលអាចបណ្តាលឲ្យមានគ្រោះថ្នាក់ នៅក្នុងអំឡុងពេលបើកបរ។ នេះបើតាមការចុះផ្សាយពីសារព័ត៌មាន CNBC។
បើតាមរដ្ឋបាលសុវត្ថិភាពចរាចរណ៍ផ្លូវជាតិ (NHTSA) បានបង្ហាញឲ្យដឹងថា ការប្រមូលមករបស់ក្រុមហ៊ុន Honda សារនេះ ភាគច្រើនទៅលើរថយន្តម៉ូដែល Acura TLX ស៊េរីឆ្នាំ២០២១-២០២៥ និងម៉ូដែល Acura MDX ស៊េរីឆ្នាំ២០២៣-២០២៥។
យ៉ាងណាមិញ បើតាមក្រុមហ៊ុន Honda បាននិយាយថា ខាងក្រុមហ៊ុនបានជូនដំណឹងដល់អតិថិជនទាំងអស់ដែលជួបបញ្ហានេះ ទាក់ទងទៅកាន់ទីភ្នាក់ងាររបស់ក្រុមហ៊ុន ដើម្បីទទួលយកការផ្លាស់ប្តូរ និងជួសជុលវិញ ដោយឥតគិតថ្លៃ។
ជម្រាបជូនផងដែរថា នៅចន្លោះខែកុម្ភៈ ឆ្នាំ២០២៤ ដល់ថ្ងៃទី៥ ខែមិថុនា របាយការណ៍ពី NHSTA បានបង្ហាញថា ក្រុមហ៊ុន Honda បានទាមទារឲ្យមានការធានារហូតដល់ទៅ ៦៧៤ ករណី ទាក់ទងនឹងបញ្ហាឈ្នាន់ហ្វ្រាំងនេះ ប៉ុន្តែមិនមានរបាយការណ៍អំពីគ្រោះថ្នាក់ ឬបង្កឲ្យមានការរងរបួសណាមួយនោះទេ៕
