ប្រធានាធិបតីអាមេរិក លោក ដូណាល់ ត្រាំ បាននិយាយថា ចិនអាចបន្តទិញចូលប្រេងពីប្រទេសអ៊ីរ៉ង់បាន ក៏ប៉ុន្តែបានលើកទឹកចិត្តឲ្យនាំចូលទំនិញបន្ថែមទៀតពីសហរដ្ឋអាមេរិកផងដែរ។ នេះបើតាមការចុះផ្សាយពីសារព័ត៌មាន Reuters។
ប្រធានាធិបតីអាមេរិក លោក ត្រាំ បាននិយាយកាលពីថ្ងៃទី២៤ ខែមិថុនាថា ចិនអាចបន្តទិញចូលប្រេងពីអ៊ីរ៉ង់បាន បន្ទាប់ពីអ៊ីស្រាអែល និងអ៊ីរ៉ង់ បានព្រមព្រៀងគ្នាលើបទឈប់បាញ់មួយ។
មិនតែប៉ុណ្ណោះ ដោយបានសរសេរលើបណ្តាញសង្គម Truth Social របស់ខ្លួន លោក ត្រាំ បាននិយាយថា៖” ឥឡូវនេះ ចិនអាចបន្តទិញប្រេងពីអ៊ីរ៉ង់បាន។ ហើយសង្ឃឹមថាពួកគេក៏នឹងបង្កើនការទិញទំនិញកាន់តែច្រើនពីសហរដ្ឋអាមេរិក ផងដែរ”។
គួរឲ្យដឹងថា លោក ត្រាំ ធ្លាប់បានដាក់ទណ្ឌកម្មលើរោងចក្រចម្រាញ់ប្រេង និងប្រតិបត្តិករកំពង់ផែចិនមួយចំនួន សម្រាប់ការទិញប្រេងអ៊ីរ៉ង់។
យ៉ាងណាមិញ ប្រទេសចិន បានប្រឆាំងជាយូរមកហើយនូវអ្វីដែលខ្លួនហៅថា ការរំលោភបំពានលើទណ្ឌកម្មឯកតោភាគី និងខុសច្បាប់របស់រដ្ឋាភិបាលទីក្រុងវ៉ាស៊ីនតោន។ ហើយនៅពេលសួរអំពីការលើកឡើងរបស់លោក ត្រាំ ជុំវិញការបើកភ្លើងខៀវឲ្យមានការទិញចូលប្រេងពីអ៊ីរ៉ង់ឡើងវិញ នេះ អ្នកនាំពាក្យក្រសួងការបរទេសចិន លោក Guo Jiakun បាននិយាយថារដ្ឋាភិបាលទីក្រុងប៉េកាំង នឹងចាត់វិធានការដើម្បីធានាសន្តិសុខថាមពល ស្របតាមផលប្រយោជន៍ជាតិរបស់ខ្លួន។
ជម្រាបជូនផងដែរថា បន្ទាប់ពីមានកិច្ចព្រមព្រៀងបទឈប់បាញ់រវាងអ៊ីរ៉ង់ និងអ៊ីស្រាអែលត្រូវបានប្រកាសកាលពីពេលថ្មីៗនេះ មតិរបស់លោក ត្រាំ លើការទិញប្រេងរបស់ចិន ត្រូវបានគេមើលឃើញថាជាសញ្ញាអវិជ្ជមានថ្មីសម្រាប់ទីផ្សារប្រេងអន្តរជាតិ ដែលរួមចំណែកដល់ការធ្លាក់ចុះតម្លៃជិត ៦% គិតនៅត្រឹមនៅថ្ងៃទី២៤ ខែមិថុនា។ ប្រេងប្រភេទ Brent និង WTI បច្ចុប្បន្នកំពុងជួញដូរនៅជុំវិញតម្លៃ ៦៨ដុល្លារ និង ៦៥ដុល្លារ ក្នុងមួយធុងបារ៉ែល រៀងៗគ្នា៕
