មហាសេដ្ឋីលំដាប់កំពូលរបស់ពិភពលោក ឬត្រូវបានស្គាល់ថាជាបិតាវិនិយោគ លោក Warren Buffett ថ្មីៗនេះ ទើបតែបានបរិច្ចាគភាគហ៊ុនរបស់ខ្លួន នៅក្នុងក្រុមហ៊ុន Berkshire Hathaway ដែលមានតម្លៃសរុបប្រមាណជាង ៦ពាន់លានដុល្លារ ទៅកាន់អង្គការសប្បុរសធម៌ជាច្រើន។ នេះបើតាមការចុះផ្សាយពីសារព័ត៌មាន Reuters។
នៅថ្ងៃទី២៧ ខែមិថុនា លោក Buffett បានផ្ទេរភាគហ៊ុន Berkshire Class B ក្នុងចំនួនប្រហែល ១២,៣៦ លានហ៊ុន។ ក្នុងចំណោមនោះ ភាគហ៊ុនចំនួន ៩,៤៣ លានហ៊ុន ត្រូវបានបរិច្ចាគទៅកាន់មូលនិធិសប្បុរសធម៌ Gates Foundation ខណ:ភាគហ៊ុនចំនួន ៩៤៣ ០០០ ហ៊ុន ត្រូវបានផ្តល់ជូនទៅកាន់មូលនិធិ Susan Thompson Buffett និងមូលនិធិ ដែលគ្រប់គ្រងដោយកូនៗទាំងបីរបស់លោក ទទួលបានច្រើនជាង ៦៦០ ០០០ ហ៊ុន ក្នុងម្នាក់ៗ។
គួរឲ្យដឹងផងដែរថា នេះជាការបរិច្ចាគដ៏ធំបំផុតរបស់លោក Buffett ពោលគឺចាប់តាំងពីលោកបានចាប់ផ្តើមបែងចែកទ្រព្យសម្បត្តិរបស់ខ្លួន ទៅកាន់អង្គការសប្បុរធម៌នានា ចាប់តាំងពីជិត ២ ទសវត្សមុន។ គិតមកទល់ពេលនេះ លោក Buffett បានបរិច្ចាគទឹកប្រាក់សរុបរបស់ខ្លួនទៅកាន់អង្គការសប្បុរសធម៌ ក្នុងចំនួនជាង ៦០ពាន់លានដុល្លារ រួចមកហើយ។
ជម្រាបជូនថា លោក Buffett នៅតែបន្តកាន់កាប់ភាគហ៊ុនចំនួន ១៣,៨% នៅក្នុងក្រុមហ៊ុន Berkshire។ មុនពេលបរិច្ចាគ លោកមានទ្រព្យសម្បត្តិសរុបចំនួន ១៥២ពាន់លានដុល្លារ និងជាប់ឈ្មោះជាមហាសេដ្ឋីមានដាច់គេទី០៥ នៅលើលោក។ នេះបើតាមការចុះផ្សាយពីទស្សនាវដ្តី Forbes៕
