ក្រុមហ៊ុនផលិតរថយន្តអគ្គិសនីលំដាប់កំពូលរបស់វៀតណាម VinFast កាលពីថ្ងៃទី២៩ ខែមិថុនា បានចាប់ផ្តើមបើកដំណើរការផលិតកម្ម នៅរោងចក្រក្នុងស្រុកទីពីររបស់ខ្លួន ក្នុងគោលបំណងបង្កើនទិន្នផលបន្ថែម ចំពេលផែនការពង្រីកអាជីវកម្មជាសកល កំពុងប្រឈមមុខទៅនឹងការពន្យារពេល។ នេះបើតាមការចុះផ្សាយពីសារព័ត៌មាន CNA។
VinFast បាននិយាយនៅក្នុងសេចក្តីថ្លែងការណ៍មួយថា រោងចក្រថ្មីរបស់ខ្លួននេះ នឹងមានទីតាំងស្ថិតនៅក្នុងខេត្ត Ha Tinh ភាគកណ្តាល ប្រទេសវៀតណាម ដោយមានសមត្ថភាពផលិតប្រចាំឆ្នាំដំបូងចំនួន ២សែនគ្រឿង និងលាតសន្ធឹងលើផ្ទៃដីទំហំ ៣៦ ហិកតា។
គួរឲ្យដឹងថា VinFast ដែលគាំទ្រដោយក្រុមហ៊ុន Vingroup ដែលជាក្រុមហ៊ុនធំជាងគេរបស់វៀតណាម បានកំណត់គោលដៅប្រកបដោយមហិច្ឆតា ក្នុងការបង្កើតរោងចក្រផលិតរថយន្ត EV ខ្លួន នៅក្នុងទីផ្សារអន្តរជាតិ រួមទាំងសហរដ្ឋអាមេរិក ឥណ្ឌា និងឥណ្ឌូណេស៊ី ផងដែរ។ តែទោះជាយ៉ាងណាក៏ដោយ ផែនការនេះ បាននិងកំពុងប្រឈមមុខនឹងឧបសគ្គជាច្រើន ក្នុងការពង្រីកអាជីវកម្មជាសកលរបស់ខ្លួន រួមទាំងតម្រូវការដែលកំពុងធ្លាក់ចុះ និងការប្រកួតប្រជែងដ៏តឹងតែង ផងដែរ។
យ៉ាងណាមិញ លោក Nguyen Viet Quang នាយកប្រតិបត្តិក្រុមហ៊ុន Vingroup បានមានប្រសាសន៍ថា ៖“នៅពេលដំណើរការ រោងចក្រ VinFast Ha Tinh វានឹងរួមចំណែកដល់គោលដៅរបស់ VinFast ក្នុងការផលិតរថយន្តឲ្យបានចំនួន ១ លានគ្រឿងក្នុងមួយឆ្នាំ ដើម្បីបំពេញតម្រូវការទីផ្សារក្នុងស្រុក និងបរទេស ដែលកំពុងកើនឡើង”។
ជម្រាបជូនថា ក្រុមហ៊ុនផលិតរថយន្ត EV ខ្នាតយក្សវៀតណាម បានកំណត់គោលដៅចែកចាយរថយន្តចំនួន ២០០ ០០០ គ្រឿងសម្រាប់ឆ្នាំ២០២៥ ដោយក្នុងរយៈពេលប្រាំខែដំបូង ពួកគេអាចលក់បានប្រហែល ៥៦ ០០០គ្រឿង ជាពិសេសនៅទីផ្សារក្នុងស្រុករបស់ខ្លួន៕
