យោងតាមរដ្ឋមន្ត្រីក្រសួងការបរទេសអ៊ីតាលី លោក Antonio Tajani បាននិយាយនៅក្នុងបទសម្ភាសមួយ នៅថ្ងៃចន្ទនេះថា សហភាពអឺរ៉ុប (EU) បានត្រៀមខ្លួននរួចជាស្រេចហើយ ដើម្បីរៀបចំបញ្ជីពន្ធគយសងសឹកទៅទំនិញរបស់សហរដ្ឋអាមេរិក ដែលមានតម្លៃ ២១ពាន់អឺរ៉ូ (២៤,៥ពាន់លានដុល្លារ) ប្រសិនបើភាគីទាំងពីរមិនអាចឈានដល់កិច្ចព្រមព្រៀងពាណិជ្ជកម្មជាមួយគ្នាទេនោះ។ នេះបើតាមការចុះផ្សាយពីសារព័ត៌មាន Reuters។
កាលពីថ្ងៃសៅរ៍ សប្តាហ៍មុន ប្រធានាធិបតីអាមេរិក លោក ដូណាល់ ត្រាំ បានប្រកាសគំរាមដាក់ពន្ធ ៣០% ទៅលើការនាំចូលទំនិញពីប្រទេសម៉ិកស៊ីក និង EU ដោយនឹងត្រូវចូលធរមានចាប់ពីថ្ងៃទី១ ខែសីហាតទៅ បន្ទាប់ពីការចរចាអស់ជាច្រើនសប្តាហ៍ ជាមួយប្រទេសដៃគូពាណិជ្ជកម្មសំខាន់ៗ របស់សហរដ្ឋអាមេរិក ដើម្បីឈានដល់ការកិច្ចព្រមព្រៀងដ៏ទូលំទូួលាយមួយ ត្រូវបានបរាជ័យ។
យ៉ាងណាមិញជុំវិញការប្រកាសរបស់លោក ត្រាំ នេះ សហភាពអឺរ៉ុប បាននិយាយកាលពីថ្ងៃអាទិត្យថា ខ្លួននឹងបន្តផ្អាកវិធានការឆ្លើយតបទៅនឹងពន្ធគយថ្មីរបស់សហរដ្ឋអាមេរិក រហូតដល់ដើមខែសីហា ហើយនឹងបន្តដាក់សម្ពាធឲ្យមានការចរចាឡើងវិញ ។
ទន្ទឹមនឹងនេះ រដ្ឋមន្ត្រីការបរទេសអ៊ីតាលី លោក Tajani បាននិយាយថា នៅក្នុងវិធានការឆ្លើយតបនោះ សហភាពអឺរ៉ុប បានត្រៀមខ្លួនរួចជាស្រេចហើយ ដោយអាចនឹងដាក់ពន្ធសងសឹកទៅលើទំនិញរបស់សហអាមេរិក ដែលមានតម្លៃ ២១ពាន់លានអឺរ៉ូ ប្រសិនបើកិច្ចព្រមព្រៀងណាមួយជាមួយសហរដ្ឋអាមេរិក បង្ហាញថាមិនអាចទៅរួចទេនោះ។ ប៉ុន្តែលោក នៅតែមានទំនុកចិត្តថា ការចរចានេះអាចនឹងមានភាពរីកចម្រើនរវាងភាគីទាំងពីរ។
ដោយឡែក អធិការបតីអាល្លឺម៉ង់ លោក Friedrich Merz បាននិយាយកាលពីថ្ងៃអាទិត្យផងដែរថា លោកនឹងធ្វើការយ៉ាងជិតស្និទ្ធជាមួយប្រធានាធិបតីបារាំង លោក Emmanuel Macron និងប្រធានគណៈកម្មការអឺរ៉ុប លោកស្រី Ursula von der Leyen ដើម្បីដោះស្រាយសង្រ្គាមពាណិជ្ជកម្មដែលកំពុងកើនឡើងជាមួយសហរដ្ឋអាមេរិក៕
