ក្រុមហ៊ុន OpenAI ដែលជាអ្នកបង្កើត ChatGPT ថ្មីៗនេះ កំពុងស្វែងរកដៃគូក្នុងស្រុក ដើម្បីបង្កើតមជ្ឈមណ្ឌលផ្ទុកទិន្នន័យដំបូងបំផុត នៅក្នុងប្រទេសឥណ្ឌា ដែលមានសមត្ថភាពយ៉ាងណាស់ ១ ជីហ្គាវ៉ាត់។ នេះបើតាមការចុះផ្សាយពីសារព័ត៌មាន Bloomberg។
OpenAI ដែលគាំទ្រដោយ Microsoft បានចុះបញ្ជីអាជីវកម្មរួចរាល់ហើយនៅក្នុងប្រទេសឥណ្ឌា ហើយគ្រោងនឹងបើកការិយាល័យដំបូង នៅក្នុងទីក្រុងញូវដេលី នៅចុងឆ្នាំនេះ ដោយមានគោលបំណងពង្រីកវត្តមាន នៅក្នុងទីផ្សារដ៏ធំបំផុតទីពីររបស់ខ្លួន។
យ៉ាងណាមិញ ជុំវិញផែនការសាងសង់មជ្ឈមណ្ឌលផ្ទុកទិន្នន័យថ្មីរបស់ OpenAI នៅឥណ្ឌានេះ អាចបង្ហាញពីជំហានថ្មីមួយនៅក្នុងទ្វីបអាស៊ី សម្រាប់ការជំរុញហេដ្ឋារចនាសម្ព័ន្ធបញ្ញាសិប្បនិម្មិត ជាមួយនឹងផែនការ Stargate របស់ខ្លួន។
គួរឲ្យដឹងថា គម្រោង Stargate នេះគឺជាការវិនិយោគក្នុងវិស័យឯកជនរហូតដល់ ៥០០ពាន់លានដុល្លារសម្រាប់ហេដ្ឋារចនាសម្ព័ន្ធ AI ដែលផ្តល់មូលនិធិដោយ SoftBank, OpenAI និង Oracle ។
ជម្រាបជូនថា ចំពោះទីតាំង និងពេលវេលានៃគម្រោងរបស់ OpenAI ដែលគ្រោងសង់ឡើងនៅប្រទេសឥណ្ឌា នៅតែមិនទាន់ដឹងច្បាស់លាស់នៅឡើយទេ ខណៈនាយកប្រតិបត្តិរបស់ក្រុមហ៊ុន លោក Sam Altman អាចនឹងប្រកាសពីព័ត៌មានជាក់លាក់ទាំងនេះ នៅពេលធ្វើដំណើរទស្សនកិច្ច ទៅកាន់ប្រទេសឥណ្ឌា ក្នុងខែកញ្ញា៕
