ក្រុមហ៊ុនខ្នាតយក្សរបស់ស្វីស Nestle បានប្រកាសបណ្តេញនាយកប្រតិបត្តិលោក Laurent Freixe ចេញពីតំណែង ដោយសារតែលោកហាក់មិនបានបង្ហាញពីទំនាក់ទំនងសេ្នហាជាមួយអ្នកក្រោមបង្គាប់ អស់ពេលមួយឆ្នាំបន្ទាប់ពីឡើងកាន់តំណែង។ នេះបើតាមការចុះផ្សាយពីសារព័ត៌មាន Reuters។
កាលពីថ្ងៃទី១ ខែកញ្ញា ក្រុមប្រឹក្សាភិបាលរបស់ក្រុមហ៊ុន Nestle បានប្រកាសតែងតាំងលោក Philipp Navratil ជានាយកប្រតិបត្តិ ជំនួសលោក Laurent Freixe ដែលត្រូវបានបញ្ចប់កិច្ចសន្យា នាពេលថ្មីៗនេះ។
ក្រុមហ៊ុនបាននិយាយថា ការសម្រេចចិត្តនេះ ត្រូវបានធ្វើឡើង បន្ទាប់ពីមានការចាប់ផ្តើមស៊ើបអង្កេតលើការចោទប្រកាន់ថា លោក Freixe បានលួចលាក់មានសេ្នហាក្រៅអាពាហ៍ពិពាហ៍ ជាមួយជំនួយការផ្ទាល់ខ្លួន ដែលធ្វើឲ្យមានការរំលោភបំពានលើក្រមសីលធម៌របស់ Nestle។
គួរឲ្យដឹងថា ការស៊ើបអង្កេតនេះត្រូវបានត្រួតពិនិត្យដោយប្រធានក្រុមហ៊ុនលោក Paul Bulcke និងនាយកឯករាជ្យ លោក Pablo Isla ផងដែរ ដោយមានការគាំទ្រពីអ្នកប្រឹក្សាផ្នែកច្បាប់ខាងក្រៅ។
មិនតែប៉ុណ្ណោះ ប្រធានក្រុមហ៊ុន លោក Paul Bulcke បាននិយាយថា ៖”នេះគឺជាការសម្រេចចិត្តដ៏ចាំបាច់មួយ។ តម្លៃ និងគោលការណ៍នៃអភិបាលកិច្ចរបស់យើង គឺជាមូលដ្ឋានគ្រឹះនៃក្រុមហ៊ុន Nestle។ យើងសូមអរគុណ Laurent សម្រាប់ការលះបង់អស់ពេលជាច្រើនឆ្នាំរបស់គាត់ចំពោះក្រុមហ៊ុន”៕
