ប្រធានាធិបតីអាមេរិក លោក ដូណាល់ ត្រាំ គ្រោងនឹងចុះហត្ថលេខាលើបទបញ្ជាប្រតិបត្តិមួយ ដើម្បីប្តូរឈ្មោះក្រសួងការពារជាតិ ទៅជាក្រសួងសង្គ្រាម ជំនួសវិញ។ នេះបើតាមការចុះផ្សាយពីសារព័ត៌មាន Reuters។
លោក ត្រាំ និងរដ្ឋមន្រ្តីក្រសួងការពារជាតិ លោក Pete Hegseth បានពិភាក្សាគ្នាអស់ពេលជាយូរមកហើយ អំពីការប្តូរឈ្មោះក្រសួងនេះ ហើយលោក Hegseth ថែមទាំងបានបង្កើតការស្ទង់មតិតាមរយៈប្រព័ន្ធផ្សព្វផ្សាយសង្គម លើប្រធានបទនេះ កាលពីដើមខែមីនាកន្លងទៅ ផងដែរ។
គួរឲ្យដឹងផងដែរថា ក្រសួងសង្គ្រាមនេះ ត្រូវបានបង្កើតឡើងនៅក្នុងឆ្នាំ១៧៨៩ ក្នុងឆ្នាំដដែលដែលរដ្ឋធម្មនុញ្ញរបស់សហរដ្ឋអាមេរិកចូលជាធរមាន។ ប៉ុន្តែក្រោយមកវាត្រូវបានប្តូរឈ្មោះទៅជាក្រសួងការពារជាតិវិញ នៅឆ្នាំ១៩៤៧ ពោលគឺក្រោយពីរឆ្នាំ បន្ទាប់ពីការបញ្ចប់សង្គ្រាមលោកលើទីពីរ។
ជម្រាបជូនថា ចាប់តាំងពីឡើងកាន់តំណែងជាប្រធានាធិបតីមក លោក ត្រាំ បានចេញបទបញ្ជាប្រតិបត្តិមួយចំនួនរួចមកហើយ ក្នុងការផ្លាស់ប្តូរឈ្មោះស្ថាប័ន ឬទីតាំងមួយចំនួន ដោយក្នុងនោះលោកក៏បានប្តូរឈ្មោះឈូងសមុទ្រម៉ិកស៊ិក ទៅជាឈូងសមុទ្រអាមេរិក ផងដែរ៕
