ប្រទេសសិង្ហបុរី កើនចំនួនសេដ្ឋីថ្មីៗជាង ៥ ២០០ នាក់ក្នុងមួយឆ្នាំ

យោងតាមរបាយការណ៍ថ្មីមួយបានបង្ហាញថា ចំនួនសេដ្ឋីលុយលានដុល្លារអាមេរិកនៅក្នុងប្រទេសសិង្ហបុរីបានកើនឡើង ២,២% កាលពីឆ្នាំមុន ឬ ៥ ២៤០ នាក់ ដែលនាំឱ្យចំនួនសរុបកើនឡើងដល់ ២៤៤ ០០០ នាក់។

យោងតាមរបាយការណ៍ទ្រព្យសម្បត្តិសកលប្រចាំឆ្នាំ២០២៦ របស់ធនាគារ UBS ដែលចេញផ្សាយកាលពីថ្ងៃអង្គារ បានបង្ហាញឲ្យដឹងថា ប្រទេសសិង្ហបុរីនៅតែស្ថិតក្នុងចំណោមប្រទេសដែលមានសេដ្ឋកិច្ចមានបំផុតនៅលើពិភពលោក ដោយទ្រព្យសម្បត្តិជាមធ្យមក្នុងមនុស្សពេញវ័យម្នាក់ឈានដល់ ៥២៧ ២១៧ដុល្លារ។

សាធារណរដ្ឋនេះជាប់ចំណាត់ថ្នាក់ទីប្រាំមួយទូទាំងពិភពលោកទាក់ទងនឹងទ្រព្យសម្បត្តិជាមធ្យមក្នុងមនុស្សពេញវ័យម្នាក់ ដោយតាមពីក្រោយប្រទេសស្វីស សហរដ្ឋអាមេរិក លុចសំបួរ ហុងកុង និងអូស្ត្រាលី។

នៅទូទាំងតំបន់អាស៊ីប៉ាស៊ីហ្វិក ទ្រព្យសម្បត្តិផ្ទាល់ខ្លួនរបស់ពលរដ្ឋម្នាក់ បានកើនឡើងជាង ៥,៩% នៅឆ្នាំ២០២៥ ដោយតំបន់នេះនៅតែជាប្រភពសំខាន់នៃបុគ្គលដែលមានទ្រព្យសម្បត្តិសរុបខ្ពស់ ជាពិសេសនៅក្នុងប្រទេសចិន និងអាស៊ីអាគ្នេយ៍។

ទន្ទឹមនឹងនេះ យោងតាមលោក Young Jin Yee សហប្រធានផ្នែកគ្រប់គ្រងទ្រព្យសម្បត្តិសកលរបស់ UBS សម្រាប់តំបន់អាស៊ីប៉ាស៊ីហ្វិក និងជាប្រធានរបស់ UBS ប្រចាំប្រទេសសិង្ហបុរី បាននិយាយថា មានសេដ្ឋីថ្មីៗជាង ១០០ ០០០ នាក់ត្រូវបានបង្កើតឡើងនៅទូទាំងតំបន់អាស៊ីប៉ាស៊ីហ្វិកជារៀងរាល់ឆ្នាំ ដែលរក្សាបានប្រហែលមួយភាគបីនៃបុគ្គលដែលមានទ្រព្យសម្បត្តិច្រើនជាសកល៕​