អាមេរិក ថាចិននឹងទិញសណ្តែងសៀងរបស់ខ្លួនឡើងវិញ​ ដើម្បីចៀសវាងការដាក់ពន្ធ ១០០%

យោងតាមរដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយថា ប្រទេសចិននឹងចាប់ផ្តើមទិញសណ្តែងសៀងរបស់អាមេរិកឡើងវិញ ដើម្បីជាផ្នែកមួយនៃការឯកភាពគ្នាជាបឋម នៅក្នុងការចរចាជុំចុងក្រោយរវាងប្រទេសមហាអំណាចសេដ្ឋកិច្ចទាំងពីរ។ នេះបើតាមការចុះផ្សាយពីសារព័ត៌មាន Reuters។

ជុំវិញព័ត៌មាននេះ ត្រូវបានលើកឡើងដោយលោក Bessent ក្នុងអំឡុងកម្មវិធីទូរទស្សន៍មួយ កាលពីថ្ងៃទី២៦ ខែតុលា បន្ទាប់ពីការចរចាជុំចុងក្រោយ ជាមួយឧបនាយករដ្ឋមន្ត្រីចិន លោក He Lap Phong និងមន្ត្រីផ្សេងទៀត នៅក្នុងទីក្រុងកូឡាឡាំពួរ ប្រទេសម៉ាឡេស៊ី។

បើតាមរដ្ឋមន្ត្រីក្រសួងរតនាគារអាមេរិករូបនេះ បានបង្ហាញឲ្យដឹងទៀតថា នេះគឺជាផ្នែកមួយនៃក្របខ័ណ្ឌដ៏សំខាន់ ដែលប្រទេសទាំងពីរទើបតែសម្រេចបាន ដើម្បីចៀសវាងការដាក់ពន្ធ ១០០% លើទំនិញរបស់ចិន និងពន្យារពេលការអនុវត្តវិធានការគ្រប់គ្រងការនាំចេញរ៉ែកម្ររបស់ចិន ផងដែរ។

យោងតាមលោក Bessentបាននិយាយទៀតថា ក្របខ័ណ្ឌនេះនឹងត្រូវបានពិភាក្សាដោយប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន លោក ស៊ីជិនពីង នៅសប្តាហ៍នេះ។ របៀបវារៈនេះត្រូវបានគេរំពឹងថានឹងរួមបញ្ចូលការលើកកម្ពស់ពាណិជ្ជកម្មដែលមានតុល្យភាពកាន់តែច្រើនរវាងសេដ្ឋកិច្ចទាំងពីរ ក៏ដូចជាកិច្ចសហប្រតិបត្តិការលើការគ្រប់គ្រងវិបត្តិគ្រឿងញៀន fentanylផងដែរ៕​