ប្រធានាធិបតីអាមេរិក លោក ដូណាល់ ត្រាំ កាលពីពេលថ្មីៗនេះ បានប្រកាសថាលោកនឹងផ្តល់ប្រាក់ចំនួន ២ ០០០ដុល្លារ សម្រាប់ពលរដ្ឋអាមេរិកម្នាក់ៗ ដែលទទួលបានពីប្រាក់ចំណេញនៃគោលនយោបាយពន្ធគយរបស់ខ្លួន។ នេះបើតាមការចុះផ្សាយពីសារព័ត៌មាន Reuters។
ដោយបង្ហោះនៅលើបណ្តាញសង្គម Truth Social របស់ខ្លួន កាលពីថ្ងៃទី៩ ខែវិច្ឆិកាកន្លងទៅនេះ លោក ត្រាំ បានសរសេរថា៖” យ៉ាងណាស់ណាស់ប្រាក់ភាគលាភចំនួន ២ ០០០ដុល្លារ ទៅនឹងត្រូវបង់ទៅឲ្យពលរដ្ឋគ្រប់រូប លើកលែងតែអ្នករកបានចំណូលខ្ពស់ប៉ុណ្ណោះ”។
ប៉ុន្តែទោះជាយ៉ាងណាក៏ដោយ លោក ត្រាំ ហាក់មិនបានបញ្ជាក់ពីលក្ខខណ្ឌច្បាស់លាស់នៃការទូទាត់ ឬពេលណាដែលការផ្តល់ជូននេះ ត្រូវធ្វើឡើងនៅឡើយនោះទេ។
យ៉ាងណាមិញ នៅក្នុងសារមួយចុះនៅថ្ងៃទី៩ ខែវិច្ឆិកា លោក ត្រាំ បានបន្ថែមថា ពន្ធបាននាំមកនូវប្រាក់ចំណូលរាប់ពាន់លានដុល្លារ ខណៈលោកថែមទាំងបានអះអាងទៀតថា ពន្ធមិនមែនជាអតិផរណានោះទេ ហើយបានរិះគន់អ្នកដែលប្រឆាំងនឹងពន្ធនេះថាជាមនុស្សល្ងង់ ថែមទៀតផង។
ជម្រាបជូនថា យោងតាមគណៈកម្មាធិការសម្រាប់ថវិកាសហព័ន្ធដែលមានការទទួលខុសត្រូវ (CRFB) បង្ហាញឲ្យដឹឹងថា សហរដ្ឋអាមេរិកបានប្រមូលពន្ធនាំចូលប្រហែល ១៥១ពាន់លានដុល្លារគិតចាប់ពីខែមេសាដល់ខែតុលា ដែលក្នុងនោះប្រហែល ៩០ពាន់លានដុល្លារ រកបានមកពីវិធានការពន្ធថ្មីរបស់លោក ត្រាំ។ ជាមួយគ្នានេះ រដ្ឋមន្ត្រីក្រសួងរតនាគារសហរដ្ឋអាមេរិក Scott Bessentបាននិយាយទៀតថា សហរដ្ឋអាមេរិកអាចនឹងប្រមូលពន្ធប្រហែល ៥០០ពាន់លានដុល្លារ ឬច្រើនជាងនេះ ជារៀងរាល់ឆ្នាំ៕
