ការវាយប្រហាររបស់សហរដ្ឋអាមេរិក ទៅលើប្រទេសវេណេស៊ុយអេឡា បានបន្តធ្វើឲ្យមាសក្លាយជាទ្រព្យសម្បត្តិដ៏មានសុវត្ថិភាពដែលមានតម្រូវការខ្ពស់ ខណៈពេលដែលស្ថានភាពនេះក៏បានជំរុញតម្លៃភាគហ៊ុនអាមេរិក កើនឡើងខ្ពស់ដល់កម្រិតកំណត់ត្រា ផងដែរ។ នេះបើតាមការចុះផ្សាយពីសារព័ត៌មាន Reuters។
នៅក្នុងអំឡុងពេលបិទការជួញដូរចុងក្រោយ កាលពីថ្ងៃទី៥ ខែមករា តម្លៃមាសបានកើនឡើង ១១៧ដុល្លារភ្លាមៗ ដល់ ៤ ៤៤៨ដុល្លារ ក្នុងមួយអោន។ នេះក៏ជាកម្រិតដ៏ខ្ពស់បំផុតមួយផងដែរ គិតចាប់តាំងពិថ្ងៃទី២៩ ខែធ្នូ ឆ្នាំមុនមក។
ទន្ទឹមនឹងនេះ បើតាមលោក Alexander Zumpfe អ្នកជួញដូរមាសប្រចាំនៅ Heraeus Metals Germany បាននិយាយថា ៖”ស្ថានភាពនៅវេណេស៊ុយអេឡា បានបង្កឲ្យតម្រូវការមាសកាន់តែហក់ឡើងខ្ពស់។ ប៉ុន្តែវាក៏មានការព្រួយបារម្ភចំពោះបញ្ហាផ្សេងទៀត ដូចជាទីតាំងភូមិសាស្រ្ត នយោបាយ ការផ្គត់ផ្គង់ថាមពល និងគោលនយោបាយរូបិយវត្ថុផងដែរ”។
មិនតែប៉ុណ្ណោះ ជុំវិញស្ថានភាពនៅក្នុងប្រទេសវេណេស៊ុយអេឡានេះ ក៏បានជំរុញទីផ្សារភាគហ៊ុនអាមេរិក កើនឡើងយ៉ាងខ្លាំងផងដែរ។ ក្នុងនោះសន្ទស្សន៍ហ៊ុន DJIA បានកើនឡើងជិត ៦០០ ពិន្ទុដល់កម្រិតខ្ពស់បំផុតគឺ ៤៨ ៩៧ ខណៈសន្ទស្សន៍ហ៊ុន S&P 500 បានបន្ថែម ០.៦៤% ដល់ ៦ ៩០២។ សន្ទស្សន៍ Nasdaq Composite បានបិទបញ្ចប់នៅត្រឹម ២៣ ៣៩៥ កើនឡើង ០.៧%។
ជម្រាបជូនផងដែរថា ប្រធានាធិបតីអាមេរិកលោក ដូណាល់ ត្រាំ បានព្រមានថា លោកអាចបន្តការវាយប្រហារវេណេស៊ុយអេឡាបន្ថែមទៀត ប្រសិនបើទីក្រុង Caracas រារាំងកិច្ចខិតខំប្រឹងប្រែងរបស់សហរដ្ឋអាមេរិកក្នុងការបើកទីផ្សារប្រេងរបស់ខ្លួន និងបញ្ឈប់ការជួញដូរគ្រឿងញៀន។ លោកក៏បានបង្ហើបទៀតផងដែរថា លោកនឹងចាត់វិធានការប្រឆាំងនឹងប្រទេសកូឡុំប៊ី និងម៉ិកស៊ិក ទាក់ទងនឹងការជួញដូរគ្រឿងញៀននេះ ដូចគ្នា៕
