លោក Jensen Huang ដែលជានាយកប្រតិបត្តិរបស់ក្រុមហ៊ុនផលិតបន្ទះឈីបកំពូល Nvidia ត្រូវបានគេរាយការណ៍ថានឹងមិនធ្វើដំណើរទៅកាន់ប្រទេសឥណ្ឌា សម្រាប់កិច្ចប្រជុំកំពូល AI Impact Summit ដែលកំពុងរៀបចំ នៅក្នុងសប្តាហ៍នេះនោះឡើយ។ នេះបើតាមការចុះផ្សាយពីសារព័ត៌មាន Reuters ។
ព្រឹត្តិការណ៍ដ៏ធំនេះ ត្រូវបានគេដឹងថាបានប្រមូលផ្តុំដោយមេដឹកនាំបច្ចេកវិទ្យា និងអ្នកនយោបាយសកលជាច្រើន ហើយនាយករដ្ឋមន្ត្រីឥណ្ឌា លោក Narendra Modi គឺជាអ្នកថ្លែងសុន្ទរកថាបើកកម្មវិធីនេះ។
យ៉ាងណាមិញ លោក Huang ត្រូវបានគេរំពឹងទុកថានឹងក្លាយជាឥស្សរជនដ៏សំខានបំផុតម្នាក់នៅក្នុងកិច្ចប្រជុំកំពូលមួយនេះ ដោយមានគម្រោងជួបសម្ភាសជាមួយអ្នកសារព័ត៌មានជាច្រើនផងដែរ នៅថ្ងៃពុធ។ ប៉ុន្តែយ៉ាងណាក៏ដោយក្រុមហ៊ុន Nvidia បាននិយាយថា លោក Huang នឹងមិនធ្វើដំណើរទៅកាន់ប្រទេសឥណ្ឌានោះឡើយ ដោយសារតែកាលៈទេសៈដែលមិនអាចមើលឃើញទុកជាមុន។
ជម្រាបជូនថា ជុំវិញអវត្តមានរបស់លោក Huang នេះ ត្រូវបានគេមើលឃើញថាជាផ្លាស់ប្តូរដ៏សំខាន់មួយ ដោយសារតែ Nvidia ត្រូវបានចាត់ទុកថាជាក្រុមហ៊ុនស្នូលដ៏ធំបំផុត សម្រាប់ការប្រកួតប្រជែងនៅក្នុងវិស័យ AI ដែលកំពុងរីកចម្រើនយ៉ាងខ្លាំង៕
