ក្រុមហ៊ុនផលិតរថយន្តកំពូលរបស់ស៊ុយអែត Volvo បានបង្កើនការប្រមូលរថយន្តអគ្គិសនីរបស់ខ្លួន នៅក្នុងប្រទេសសិង្ហបុរី ដោយសារតែបញ្ហាអាគុយដែលអាចបង្កើនហានិភ័យនៃការឆាបឆេះ ដែលធ្វើឲ្យចំនួនសរុបកើនឡើងដល់ ១៩៨ គ្រឿង។ នេះបើតាមការចុះផ្សាយពីសារព័ត៌មាន The Straits Times ។
ប្រភពដដែលបានបង្ហាញឲ្យដឹងថាទៀតថា ក្រុមហ៊ុន Volvo បានជូនដំណឹងដល់ម្ចាស់រថយន្តម៉ូដែល EX30 Single Motor Extended Range ចំនួន៥៨ គ្រឿងដែលត្រូវរងផលប៉ះពាល់ដោយសារតែបញ្ហានេះ បន្ទាប់ពីម្ចាស់រថយន្តចំនួន១៣៦ ត្រូវបានជូនដំណឹងដូចគ្នា កាលពីក្នុងខែមករា។
យ៉ាងណាមិញ អ្នកនាំពាក្យរបស់ក្រុមហ៊ុន Wearnes Automotive ដែលជាអ្នកចែកចាយរបស់ Volvo នៅក្នុងប្រទេសសិង្ហបុរី បានបញ្ជាក់ថា ម្ចាស់រថយន្តដែលរងផលប៉ះពាល់ទាំងអស់ត្រូវបានជូនដំណឹង អំពីបញ្ហាដែលអាចកើតមាននៅក្នុងអាគុយវ៉ុលខ្ពស់របស់រថយន្ត ដែលអាចបណ្តាលឱ្យឡើងកំដៅខ្លាំង ប្រសិនបើសាកលើសពីកម្រិត ៧០% ហើយវាអាចបណ្តាលឱ្យមានអគ្គីភ័យ នៅក្នុងករណីដ៏អាក្រក់បំផុត។
ជម្រាបជូនផងដែរថា ក្រុមហ៊ុន Volvo កន្លងមកបានបង្ហោះការជូនដំណឹងអំពីការប្រមូលរថយន្តឡើងវិញទៅកាន់ប្រព័ន្ធប្រមូលរថយន្តអេឡិចត្រូនិចរបស់អាជ្ញាធរដឹកជញ្ជូនផ្លូវគោក ស្របតាមករណីស្រដៀងគ្នាដែលកំពុងកើតឡើងនៅទូទាំងពិភពលោក។ ទាំងនេះរួមមានយានយន្តចំនួន ១០ ៤៤០ គ្រឿងនៅចក្រភពអង់គ្លេស ២ ៨១៥ គ្រឿងនៅអូស្ត្រាលី និង ៤០ គ្រឿងនៅសហរដ្ឋអាមេរិក៕
