នៅថ្ងៃទី២៦ ឧសភា រដ្ឋាភិបាលប្រទេសជប៉ុន បានឈល់ព្រមលើការចំណាយទឹកប្រាក់រាប់ពាន់លានដុល្លារ ដើម្បីជួយគ្រួសារនានាក្នុងសប្រទេសបង់វិក្កយបត្រអគ្គិសនី និងហ្គាស់ ដែលកំពុងកើនឡើងខ្ពស់ ដោយសារតែសង្គ្រាមនៅមជ្ឈិមបូព៌ា។ នេះបើតាមការចុះផ្សាយពីសារព័ត៌មាន Reuters។
លោក Masanao Ozaki អនុប្រធានលេខាធិការគណៈរដ្ឋមន្ត្រី បានប្រាប់អ្នកយកព័ត៌មានថា ៖”យើងបានអនុម័តការបែងចែកថវិកាចំនួន ៥១៣,៥ពាន់លានយ៉េន (៣,២ពាន់លានដុល្លារអាមេរិក) នៅក្នុងកិច្ចប្រជុំគណៈរដ្ឋមន្ត្រីថ្ងៃនេះ”។ ថវិកានេះផងដែរ មានគោលបំណងជួយគ្រួសារនានា បង់វិក្កយបត្រអគ្គិសនី និងឧស្ម័ន ក្នុងអំឡុងពេលខែកក្កដា ដល់ខែកញ្ញា។
ជុំវិញការសម្រេចចិត្តនេះ ត្រូវបានធ្វើឡើងត្រឹមតែមួយថ្ងៃបន្ទាប់ពីនាយករដ្ឋមន្ត្រី លោកស្រី Sanae Takaichi បានប្រកាសពីផែនការមួយដើម្បីបែងចែកថវិកាបន្ថែមចំនួន ១៩ពាន់លានដុល្លារ ដើម្បីដោះស្រាយការកើនឡើងនៃតម្លៃផលិតផលផ្សេងៗ។
សូមជម្រាបជូនផងដែរថា ដូចទៅនឹងប្រទេសអាស៊ីជាច្រើនផ្សេងទៀតដែរ ជប៉ុន ពឹងផ្អែកយ៉ាងខ្លាំងទៅលើការនាំចូលប្រេងឥន្ធនៈពីមជ្ឈិមបូព៌ា។ ការបិទច្រកសមុទ្រ Hormuz ចាប់តាំងពីចុងខែកុម្ភៈមក បានរំខានដល់ការផ្គត់ផ្គង់ប្រេងឆៅ និងឧស្ម័នធម្មជាតិរាវ (LNG) ចំនួន ២០% ទូទាំងពិភពលោក។ មជ្ឈិមបូព៌ាមានចំនួន ៩៥% នៃប្រេងនាំចូលសរុបរបស់ប្រទេសជប៉ុន៕
