ធនាគារពិភពលោក (WB) កំពុងសម្លឹងមើលការរៀបចំហិរញ្ញប្បទានដ៏មានសក្តានុពលចំនួនជាង ៣ពាន់លានដុល្លារ សម្រាប់ប្រទេសហ្វីលីពីន នៅក្នុងឆ្នាំសារពើពន្ធក្រោយ ជាមួយនឹងគម្រោងផ្តោតលើការការពារសង្គម ការអភិវឌ្ឍជំនាញ ការធ្វើទំនើបកម្មរដ្ឋាភិបាល និងកំណែទម្រង់រចនាសម្ព័ន្ធ។ នេះបើតាមការចុះផ្សាយពីសារព័ត៌មាន VNA។
លោក Zafer Mustafaoglu នាយកផ្នែកធនាគារពិភពលោកប្រចាំប្រទេសហ្វីលីពីន បានប្រាប់សារព័ត៌មាន កាលពីពេលថ្មីៗនេះថា WB ដែលជាអ្នកផ្តល់កម្ចី កំពុងរៀបចំផែនការកម្មវិធីសម្រាប់ឆ្នាំសារពើពន្ធ២០២៧ របស់ខ្លួន ដែលនឹងត្រូវចាប់ផ្តើមពីថ្ងៃទី១ ខែកក្កដា ឆ្នាំ២០២៦ ដល់ថ្ងៃទី៣០ ខែមិថុនា ឆ្នាំ២០២៧។
WB ក៏កំពុងពិចារណាលើគំនិតផ្តួចផ្តើមកំណែទម្រង់រចនាសម្ព័ន្ធ ក៏ដូចជាគម្រោងដែលអាចជួយរដ្ឋាភិបាលឆ្លើយតបទៅនឹងផលប៉ះពាល់សេដ្ឋកិច្ចពីជម្លោះនៅមជ្ឈិមបូព៌ា ជាពិសេសក្នុងចំណោមវិស័យងាយរងគ្រោះផ្សេងៗ។ លោក Zafer បានបន្ថែមថា ខ្លួនកំពុងធ្វើការពិភាក្សាជាមួយរដ្ឋាភិបាលហ្វីលីពីន ខណៈពេលដែលទីក្រុងម៉ានីល កំពុងពិនិត្យឡើងវិញនូវអាទិភាពរបស់ខ្លួនក្រោមរបៀបវារៈនៃការខ្ចីប្រាក់របស់ខ្លួន។
គួរជម្រាបជូនផងដែរថា ក្រោមក្របខណ្ឌភាពជាដៃគូរបស់ក្រុមប្រទេសធនាគារពិភពលោក (WBG) សម្រាប់ហ្វីលីពីន នៅចន្លោះឆ្នាំ ២០២៥-២០៣១ គោលដៅចម្បង គឺដើម្បីលើកកម្ពស់គុណភាពជីវិតរបស់ប្រជាជនហ្វីលីពីន ដោយពង្រីកឱកាសអភិវឌ្ឍ និងពង្រឹងភាពធន់ចំពោះវិបត្តិសេដ្ឋកិច្ច សង្គម និងអាកាសធាតុ៕
