រដ្ឋាភិបាលទីក្រុងវ៉ាស៊ីនតោន កំពុងព្យាយាមបង្កើនសម្ពាធសេដ្ឋកិច្ចកាន់តែខ្លាំងទៅលើទីក្រុងតេអេរ៉ង់ តាមរយៈការដាក់ទណ្ឌកម្មលើការលក់ប្រេង និងរារាំងពីការចូលទៅប្រើប្រាស់រូបិយប័ណ្ណគ្រីបតូផងដែរ។ នេះបើតាមការចុះផ្សាយពីសារព័ត៌មាន AFP។
ក្រសួងរតនាគារសហរដ្ឋអាមេរិក កាលពីពេលថ្មីៗនេះ បានប្រកាសពីការពង្រីកទណ្ឌកម្មដែលផ្តោតលើឧស្សាហកម្មប្រេងរបស់អ៊ីរ៉ង់ ដោយផ្តោតលើបណ្តាញអាជីវកម្មរបស់មហាសេដ្ឋីប្រេង Mohammad Hossein Shamkhani។ ក្រសួងនេះក៏បានបង្កកកាបូបឌីជីថលគ្រីបតូដែលមានតម្លៃប្រមាណ ១៣០លានដុល្លារដែលភ្ជាប់ទៅនឹងធនាគារកណ្តាលអ៊ីរ៉ង់ផងដែរ។
ជុំវិញវិធានការចុងក្រោយនេះបានកើតឡើងបន្ទាប់ពីយោធាអាមេរិកបានបើកការវាយប្រហារតាមអាកាសប្រឆាំងនឹងអ៊ីរ៉ង់សម្រាប់ថ្ងៃទីបួនជាប់ៗគ្នា និងបានដាក់ការបិទខ្ទប់ច្រកសមុទ្ររបស់ប្រទេសនេះឡើងវិញ។
ក្រសួងរតនាគារសហរដ្ឋអាមេរិកបាននិយាយថា ៖”នេះគឺជាកិច្ចខិតខំប្រឹងប្រែងរបស់ក្រសួងរតនាគារដើម្បីបង្កើនសម្ពាធសេដ្ឋកិច្ចលើរបបអ៊ីរ៉ង់បន្ទាប់ពីវាបានបន្តការវាយប្រហារដែលបង្កអស្ថិរភាពនៅក្នុងច្រកសមុទ្រ Hormuz”។
ក្រសួងបានអះអាងទៀតថា បណ្ដាញអាជីវកម្មរបស់លោក Shamkhani នៅតែជាកម្លាំងសំខាន់នៅពីក្រោយការនាំចេញប្រេងរបស់អ៊ីរ៉ង់ ហើយថែមទាំងបានពង្រីកទៅក្នុងការជួញដូរទំនិញផ្សេងៗទៀតជាច្រើនប្រភេទទៀត។ ហើយទណ្ឌកម្មថ្មីចុងក្រោយនេះនឹងផ្តោតលើបុគ្គល អង្គការ និងនាវាសរុបជាង ៥០ ដែលទីក្រុងវ៉ាស៊ីនតោនចោទប្រកាន់ថាបានជួយដល់របបតេអេរ៉ង់ ដើម្បីទទួលបានប្រាក់ចំណេញ។
យោងតាមក្រសួងរតនាគារសហរដ្ឋអាមេរិក រហូតមកដល់ពេលនេះ បានដាក់ទណ្ឌកម្មលើបុគ្គល អង្គការ និងនាវាជាង ២០០ គ្រឿង ដែលដំណើរការក្រោមការឧបត្ថម្ភរបស់បណ្ដាញមហាសេដ្ឋី Shamkhani។ លោក Shamkhani គឺជាកូនប្រុសរបស់លោក Ali Shamkhani ដែលជាទីប្រឹក្សាសន្តិសុខជាន់ខ្ពស់របស់មេដឹកនាំកំពូលអ៊ីរ៉ង់ លោក Ali Khamenei៕
