ប្រធានាធិបតីរុស្ស៊ី លោក វ៉្លាឌីមៀ ពូទីន បានចេញបញ្ជាឲ្យមានការរឹបអូសក្រុមហ៊ុនលក់រថយន្តធំបំផុតនៅប្រទេសរុស្ស៊ីគឺក្រុមហ៊ុន Roft ដែលជាកម្មសិទ្ធរបស់អតីតសមាជិកសភា និងជាមហាសេដ្ឋីដែលនិរទេសខ្លួន លោក Sergei Petrov។
យោងតាមការចុះផ្សាយពីសារព័ត៌មាន TheMoscowTimes បានបង្ហាញថា ភាគហ៊ុននៃក្រុមហ៊ុនលក់រថយន្តមួយនេះ នឹងត្រូវផ្ទេរពីក្រុមហ៊ុន Delance Limited និងក្រុមហ៊ុន Rolf Motors ទៅទីភ្នាក់ងារគ្រប់គ្រងទ្រព្យសម្បត្តិសហព័ន្ធរបស់រុស្ស៊ី (Rosimushchestvo) វិញ។
គូសបញ្ជាក់ដែរថា នេះគឺជាលើកទីមួយហើយ ដែលរដ្ឋាភិបាលចេញបញ្ជារឹបអូសអាជីវកម្មគ្រប់គ្រងដោយជនជាតិរុស្ស៊ី តាំងពីរុស្ស៊ីបើកប្រតិបត្តិការពិសេសលើប្រទេសអ៊ុយក្រែន ខណៈកន្លងមកលោក ពូទីន ធ្លាប់តែបញ្ជាឲ្យមានការរឹបអូសក្រុមហ៊ុនលោកខាងលិចប៉ុណ្ណោះ។
សូមជម្រាបដែរថា មហាសេដ្ឋី Petrov បច្ចុប្បន្នកំពុងសំងំលាក់ខ្លួននៅប្រទេសអូទ្រីស បន្ទាប់ពីលោកបានច្រានចោលរាល់ការចោទប្រកាន់ ទាក់ទងនឹងបទឧក្រិដ្ឋកម្មផ្សេងៗ ជុំវិញការប្រឆាំងជាមួយរដ្ឋាភិបាលរុស្ស៊ី។
បន្ថែមពីការចោទប្រកាន់ខាងលើ មហាសេដ្ឋីរុស្ស៊ីដែលមានទ្រព្យសម្បត្តិ ១ពាន់លានដុល្លារម្នាក់នេះ ក៏ត្រូវរដ្ឋាភិបាលចោទថា បានឃុបឃិតគ្នាជាមួយអ្នកគ្រប់គ្រងក្រុមហ៊ុន Rolf ជុំវិញការក្លែងបន្លំឯកសារ ដើម្បីផ្ទេរប្រាក់ប្រហែល ៤៤លានដុល្លារ ទៅកាន់ក្រុមហ៊ុននៅប្រទេសស៊ីបថែមទៀត៕
