ពលរដ្ឋអ៊ីស្រាអែលមានទ្រព្យសម្បត្តិច្រើន កំពុងចេញពីប្រទេសច្រើនឡើងៗ ដែលធ្វើឲ្យរដ្ឋខាតលុយពន្ធអស់រាប់រយលានដុល្លារ

យោងតាមការសិក្សាថ្មីមួយដោយអាជ្ញាធរពន្ធដារអ៊ីស្រាអែល បានរកឃើញថា ជនជាតិអ៊ីស្រាអែលដែលមានប្រាក់ចំណូលខ្ពស់ដែលធ្វើការក្នុងវិស័យបច្ចេកវិទ្យា និងថែទាំសុខភាព កំពុងធ្វើចំណាកស្រុកក្នុងចំនួនកើនឡើងយ៉ាងខ្លាំង ពោលគឺស្ទើរតែទ្វេដងក្នុងរយៈពេលប្រាំឆ្នាំចុងក្រោយ។ នេះបើតាមការចុះផ្សាយពីសារព័ត៌មាន The Times of Israel។

យោងតាមការសិក្សាស្រាវជ្រាវដោយផ្នែកផែនការ និងសេដ្ឋកិច្ចរបស់អាជ្ញាធរពន្ធដារអ៊ីស្រាអែល ដែលបានពិនិត្យមើលលើប្រាក់ចំណូលរបស់ជនអន្តោប្រវេសន៍អ៊ីស្រាអែល ក្នុងរយៈពេលមួយទសវត្សកន្លងមកនេះ បានរកឃើញថាអត្រាដែលជនជាតិអ៊ីស្រាអែលដែលមានទ្រព្យសម្បត្តិច្រើន ចាកចេញពីប្រទេសបានកើនឡើងយ៉ាងខ្លាំងនៅចន្លោះឆ្នាំ២០២៣ និង ២០២៤ ដល់កម្រិតខ្ពស់បំផុត ហើយស្ទើរតែទ្វេដងនៃចំនួននៅឆ្នាំ២០១៩។

យ៉ាងណាមិញ ជុំវិញការផ្លាស់ប្តូរនេះកំពុងធ្វើឱ្យរដ្ឋខាតបង់ចំណូលពីពន្ធប្រមាណ ១,២ពាន់លានសេកែល (៤០០លានដុល្លារ) ជារៀងរាល់ឆ្នាំ ជាតួលេខដែលអ្នកស្រាវជ្រាវព្រមានថាអាចកើនឡើងជិតបីដងក្នុងរយៈពេលប្រាំឆ្នាំខាងមុខ។

ការខាតបង់ពន្ធប្រចាំឆ្នាំពីអ្នករកចំណូលខ្ពស់ដែលបានចាកចេញពីប្រទេស បានកើនឡើងពីប្រហែល ៥០០លានសេកែល (១៦៦លានដុល្លារ) មុនឆ្នាំ២០១៩ ដល់ប្រហែល ១,២ពាន់លានសេកែល (៤០០លានដុល្លារ) ក្នុងឆ្នាំ២០២៣ និង ២០២៤។ ហើយប្រសិនបើនិន្នាការនេះនៅតែបន្ត អ្នកស្រាវជ្រាវប៉ាន់ប្រមាណថាការខាតបង់ប្រចាំឆ្នាំអាចឡើងដល់ ៣,៥ពាន់លានសេកែល (១,១៦ពាន់លានដុល្លារ) ក្នុងរយៈពេលប្រាំឆ្នាំខាងមុខ។

គួរឲ្យដឹងថាការសិក្សារបស់អាជ្ញាធរពន្ធដារ បានកើតឡើងបន្ទាប់ពីរបាយការណ៍របស់សាកលវិទ្យាល័យ Tel Aviv ដែលបានចេញផ្សាយកាលពីដើមសប្តាហ៍មុន ដែលបង្ហាញពីនិន្នាការនៃការធ្វើចំណាកស្រុកពីអ៊ីស្រាអែលដែលបានបន្តនៅឆ្នាំ២០២៥ ដោយមានជនជាតិអ៊ីស្រាអែលជិត ៥០ ០០០ នាក់បានចាកចេញពីប្រទេសនេះនៅឆ្នាំទីបីជាប់ៗគ្នា។

ជម្រាបជូនថា តាមប្រវត្តិសាស្ត្រ ការធ្វើចំណាកស្រុករបស់ពលរដ្ឋអ៊ីស្រាអែលភាគច្រើនត្រូវបានបង្កើតឡើងជុំវិញការស្វែងរកឱកាសសេដ្ឋកិច្ចកាន់តែប្រសើរនៅបរទេស។ របាយការណ៍របស់សាកលវិទ្យាល័យ Tel Aviv បានសន្មតថាជម្លោះយោធាដ៏យូរអង្វែងរបស់អ៊ីស្រាអែល និងភាពតានតឹងនយោបាយបានជំរុញឱ្យមានការធ្វើចំណាកស្រុកកើនឡើង ដែលអាចគំរាមកំហែងដល់ផលប្រយោជន៍យុទ្ធសាស្ត្ររយៈពេលវែងរបស់ប្រទេស៕​