វិវាទ​លែងលះ​ភរិយា មហាសេដ្ឋី​មាន​បំផុត​ទី ២ នៅ​រុស្ស៊ី​ប្រឈម​​បាត់បង់​ទ្រព្យសម្បត្តិ​ពាក់កណ្ដាល

អន្តរជាតិ

លោក​ Vladimir Potanin ដែល​គ្រប់គ្នា​ស្គាល់​ថា​ជា​មហាសេដ្ឋី​មាន​បំផុត​​ទី ២ នៅ​រុស្ស៊ី កំពុង​ប្រឈម​មុខ​នឹង​ការ​បាត់បង់​ទ្រព្យសម្បត្តិ​រហូត​ដល់​ទៅ​ពាក់កណ្ដាល​ ដោយសារ​វិវាទ​លែងលះ​ជាមួយ​អតីតភរិយា​។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

អ្នកស្រី Natalia Potanina ដែល​ជា​អតីត​ភរិយា​របស់​មហាសេដ្ឋី​ខាងលើ កំពុង​ប្ដឹងប្ដល់​ចង់​បាន​ទ្រព្យសម្បត្តិ​ប្រមាណ ៥០% ពី​ភាគហ៊ុន​សរុប​របស់​លោក Potanin ​នៅ​ក្រុមហ៊ុន MMC Norilsk Nickel PJSC ដែល​ចំនួន​មួយ​នេះ គឺ​ជា​ចំនួន​អតិបរមា​តែម្ដង ហើយ​បើគិត​ជា​ទឹកប្រាក់​គឺ​អាច​នឹង​ច្រើនជាង ៧ ពាន់​លាន​ដុល្លារ ដោយសារ​មហាសេដ្ឋី​រុស្ស៊ី​កាន់កាប់ ១/៣ នៃ​ភាគហ៊ុន​សរុប​នៅ​ក្រុមហ៊ុន​ផលិត​លោហៈ​មួយ​នេះ។

យ៉ាងណា អតីត​ស្វាមី​រូបនេះ​ទំនង​មិន​ព្រម​ប្រគល់​ទឹកប្រាក់​ពាន់​លាន​ដុល្លារ​ងាយៗ​ឡើយ ពោល​លោក​បាន​ធ្វើការ​ប្ដឹងបក​វិញ ខណៈ​បច្ចុប្បន្ន​កំពុង​រង់ចាំ​ការ​បកស្រាយ​ពី​តុលាការ។ នេះ​បើតាម​ការ​ឲ្យ​ដឹង​ពី​ចៅក្រម Nicholas Francis។

ដោយឡែក​ អ្នកស្រី Potanina បាន​និយាយ​ថា នឹង​យល់ព្រម​ទទួល​ចំណែក ៥០% នៃ​ភាគហ៊ុន​សរុប​នៃ​ក្រុមហ៊ុន Norilsk គិត​តាំងពី​ឆ្នាំ ២០១៤ ខណៈ​ដែល​អតីត​ស្វាមី​របស់​អ្នកស្រី​ប្រមូល​បាន​ប្រមាណ ៦,៦ ពាន់​លាន​ដុល្លារ​គិត​តាំងពី​ពេល​នោះ​មក ហើយ​បើ​គិត​ពី​ទ្រព្យសម្បត្តិ​សរុប​វិញ គឺ​មហាសេដ្ឋី​រូប​នេះ​មាន​រហូត​ដល់ ២៩,៩ ពាន់​លាន​ដុល្លារ។ នេះ​បើ​តាម​ការ​ឲ្យ​ដឹង​​ពី Bloomberg Billionaires។

បញ្ជាក់​ដែរ​ថា អ្នកស្រី Potanina បាន​អះអាង​ថា អ្នកស្រី​ទទួល​បាន​ប្រាក់​ប្រមាណ ៤០ លាន​ដុល្លារ​សម្រាប់​ការ​លែងលះ​គ្នា ស្របពេល​អតីត​ស្វាមី​ប្រកែក​ថា អ្នកស្រី​ទទួល​បាន​ ៨៤ លាន​ដុល្លារ ដែល​នេះ​ជា​ការ​សម្រេច​របស់​តុលាការ ផ្អែក​លើ​ទំហំ​ទ្រព្យសម្បត្តិ​របស់​លោក និង​រយៈពេល​នៃ​ការ​រៀបអាពាហ៍ពិពាហ៍​ដល់​ទៅ ៣១ ឆ្នាំ​កន្លង​មក​នេះ៕

ប្រភព: Bloomberg