ភាគហ៊ុនរបស់ក្រុមហ៊ុន Netflix បានធ្លាក់ចុះរហូតដល់ ១ភាគ៤ នៃតម្លៃរបស់ពួកគេ កាលពីថ្ងៃអង្គារ បន្ទាប់ពីបានប្រកាស អំពីការធ្លាក់ចុះខ្លាំងនៃអតិថិជនរបស់ខ្លួន នៅក្នុងត្រីមាសទីមួយ ឆ្នាំ ២០២២ នេះ ។
ជាក់ស្តែង វាជាលើកដំបូងហើយ ក្នុងរយ:ពេលមួយទសវត្សរ៍ចុងក្រោយ ដែលក្រុមហ៊ុនផ្តល់សេវាស្រ្ទីមភាពយន្តឈានមុខគេមួយនេះ បានបាត់បង់អតិថិជន ស្របពេល Netflix បានដាក់ការស្តីបន្ទោស ទៅលើការផ្អាកសេវាកម្មខ្លួន នៅក្នុងប្រទេសរុស្ស៊ី ក៏ដូចជាការចែករំលែកពាក្យសំងាត់ របស់អ្នកប្រើប្រាស់ផងដែរ ។
គួរឱ្យដឹងថា ក្រុមហ៊ុន Netflix បានបញ្ចប់ត្រីមាសទីមួយ ឆ្នាំនេះ ជាមួយនឹងអតិថិជន ២២១,៦ លាននាក់ ដែលជាចំនួនតិចជាងត្រីមាសចុងក្រោយ នៃឆ្នាំមុខបន្តិច ។
បន្ថែមពីនេះ ភាគហ៊ុនរបស់ Netflix បានធ្លាក់ចុះច្រើនជាង ២៥% មកនៅត្រឹម ២៥៩,៣០ ដុល្លារ នៅក្នុងការទិញដូរចុងក្រោយនៃទីផ្សារ ពោលគឺបន្ទាប់ពីមានការចេញផ្សាយតួលេខប្រាក់ចំណូល និងការធ្លាក់ចុះអតិថិជនរបស់ក្រុមហ៊ុន ។
លើសពីនេះ ក្រុមហ៊ុន Netflix ជឿជាក់ថាកត្តាដែលបានរារាំងកំណើនរបស់ខ្លួន គឺបណ្តាលមកពីអតិថិជន បានចែករំលែកពាក្យសំងាត់គណនីរបស់ពួកគេ ជាមួយមនុស្សដែលមិនរស់នៅក្នុងផ្ទះតែមួយ ។
មិនតែប៉ុណ្ណោះ ក្រុមហ៊ុនបានប៉ាន់ប្រមាណថា ខណៈពេលដែលអ្នកប្រើប្រាស់មាន ២២២ លានគ្រួសារ ដែលបានបង់ថ្លៃសេវាសម្រាប់គណនី គឺត្រូវបានចែករំលែកជាមួយគ្រួសារជាង ១០០ លានផ្សេងទៀត ដែលមិនបានបង់ថ្លៃសេវា ៕
ប្រភព: Bangkok Post
