កាលពីថ្ងៃទី ១៩ មេសាកន្លងទៅ មហាអំណាចចិនបានចុះកិច្ចព្រមព្រៀងសន្តិភាពជាមួយប្រជុំកោះសូឡូម៉ូន ហើយសន្ធិសញ្ញាសន្តិភាពមួយនេះបានបណ្ដាលឲ្យអាមេរិក និងមហាអំណាចលោកខាងលិចផ្សេងទៀតហាក់មានការព្រួយបារម្ភជាខ្លាំង។ នេះបើតាមការបង្ហើបឲ្យដឹងពីប្រមុខខុទ្ទកាល័យជប៉ុន។
កិច្ចព្រមព្រៀងសន្តិភាពមួយនេះគឺជាផ្លូវដ៏សំខាន់បំផុតសម្រាប់ប្រទេសចិនក្នុងការធ្វើពាណិជ្ជកម្មនៅតំបន់ Pacific ដែលសំបូរទៅដោយធនធានយ៉ាងសំបូរបែប ហើយសម្រាប់អូស្ត្រាលី និងនូវែលសេឡង់ក៏បានចាត់ទុកទីនោះជាប្រភពចំណូលដ៏ធំអស់ជាច្រើនទសវត្សមកហើយ។
ដោយឡែក សម្រាប់សហរដ្ឋអាមេរិកវិញក៏បានបង្ហាញការព្រួយបារម្ភសម្រាប់ការចុះកិច្ចព្រមព្រៀងសន្តិភាពមួយនេះផងដែរ ដោយពួកគេបានចេញលិខិតនៅក្នុងសប្ដាហ៍នេះថា អាមេរិក ជប៉ុន អូស្ត្រាលី និងនូវែលសេឡង់គឺកំពុងមានការព្រួយបារម្ភ។
“កិច្ចព្រមព្រៀងមួយនេះទំនងនឹងជះឥទ្ធិពលដល់តំបន់សុវត្ថិភាពជាច្រើន ដូច្នេះពួកយើងគឺកំពុងតែធ្វើការសង្កេតយ៉ាងល្អិតល្អន់។ វាអាចនឹងមានការពិភាក្សាដោយសេរី និងបើកចំហអំពីបញ្ហាទាក់ទងនឹងតំបន់ឥណ្ឌូប៉ាស៊ីហ្វិក រវាងថ្នាក់ដឹកនាំទាំង ២”។ នេះជាអ្វីដែលលោក Hirokazu Matsuno ប្រមុខខុទ្ទកាល័យជប៉ុនបាននិយាយ។
បើទោះជាមន្ត្រីខាងលើមិនបានបញ្ជាក់លំអិតក៏ដោយ តែវាប្រហែលជាអាចនឹងបង្ហាញឲ្យដឹងពេលដែលនាយករដ្ឋមន្ត្រីជប៉ុន Fumio Kishida និងនាយករដ្ឋមន្ត្រីនូវែលសេឡង់ Jacinda Ardern ជួបគ្នាពិភាក្សាអំពីបញ្ហាខាងលើនៅពេលដ៏ខ្លីខាងមុខនេះ។
មូលហេតុមួយទៀតក្រៅពីផ្លូវពាណិជ្ជកម្មដែលធ្វើឲ្យមហាអំណាចលោកខាងលិចខ្លាចរអា គឺពួកគេបារម្ភខ្លាចចិននឹងប្រើប្រាស់ប្រជុំកោះដែលមានចំងាយត្រឹម ២ ០០០ គីឡូម៉ែត្រពីអូស្ត្រាលី ធ្វើជាមូលដ្ឋានពង្រីកកម្លាំងយោធានៅតំបន់ប៉ាស៊ីហ្វិក ហើយចំណុចនេះទៀតសោតបានធ្វើឲ្យតៃវ៉ាន់កាន់តែបារម្ភ ដ្បិតបច្ចុប្បន្នទំនាក់ទំនងរវាងតៃវ៉ាន់ និងចិនប្រៀបដូចជាទឹក និងប្រេង៕
ប្រភព: CNA
