កិច្ចព្រមព្រៀងសម្រាប់ការនាំចេញផលិតផលកសិកម្មដែលបានធ្វើឡើងរវាងអ្នកតំណាងរុស្ស៊ី តួកគី អ៊ុយក្រែន និងអង្គការសហប្រជាជាតិបានសម្រេចទៅកាលពីសប្ដាហ៍មុន ខណៈប្រធានាធិបតី Volodymyr Zelensky បង្ហើបថា ការនាំចេញផលិតផលកសិកម្មនឹងធ្វើឡើងឆាប់ៗនេះ។
ក្នុងនោះផងដែរ ថ្នាក់ដឹកនាំអ៊ុយក្រែនបានស្នើសុំឲ្យដៃគូពាណិជ្ជកម្មទាំងអស់រឿងមួយ នោះគឺជួយការពារការនាំចេញផលិតផលកសិកម្មរបស់អ៊ុយក្រែនទៅលើទីផ្សារអន្តរជាតិ នេះក៏មានន័យថា Zelensky ចង់ឲ្យដៃគូពាណិជ្ជកម្មធ្វើជាសាក្សី បើសិនជារុស្ស៊ីល្មើសកិច្ចព្រមព្រៀងដែលទើបនឹងអនុម័តថ្មីថ្មោង។
“ខ្ញុំជឿថា ពួកយើងនឹងអាចបើកការនាំចេញឡើងវិញឆាប់ៗនេះ ហើយនឹងអាចបង្ហាញឲ្យពិភពលោកបានឃើញថា អ៊ុយក្រែនមិនមែនរារាំងមិនចង់ផ្គត់ផ្គង់អាហារទៅលើទីផ្សារអន្តរជាតិទេ ដូច្នេះខ្ញុំសុំឲ្យប្រទេសដៃគូទាំងអស់ ជួយធ្វើសាក្សីផង”។ នេះបើតាមសម្ដីរបស់ប្រធានាធិបតីអ៊ុយក្រែនបាននិយាយ។
សូមជម្រាបដែរថា លោក Zelenskyy បានសង្កត់ធ្ងន់ថា រុស្ស៊ីគឺបានល្មើសនឹងកិច្ចព្រមព្រៀងភ្លាមៗនៅពេលដែល កងយោធារុស្ស៊ីវាយប្រហារកំពង់ផែ Odesa បន្ទាប់ពីចុះកិច្ចព្រមព្រៀងការនាំចេញនៅអ៊ីស្តង់ប៊ុលមិនបានប៉ុន្មាន៕
