ក្រុមហ៊ុនអចលនទ្រព្យខ្នាតយក្សរបស់ចិន Evergrande Group ថ្មីៗនេះ កំពុងប្រកាសលក់ទីស្នាក់ការកណ្តាលរបស់ខ្លួន នៅក្នុងទីក្រុងហុងកុង តាមរយ:ការដាក់ដេញថ្លៃមួយ ដែលបានបញ្ចប់ទៅកាលពីថ្ងៃព្រហស្បតិ៍ ស្របពេលក្រុមហ៊ុនអភិវឌ្ឍន៍អចលនទ្រព្យហុងកុង CK Asset បានបញ្ជាក់ថា ខ្លួនបានចូលរួមក្នុងការដេញថ្លៃនេះ ។ នេះបើយោងតាប្រភពពីសារព័ត៌មានធំៗជាច្រើនបានចុះផ្សាយ ។
ជាមួយនឹងបំណុលច្រើនជាង ៣០០ ពាន់លានដុល្លារ ក្រុមហ៊ុន Evergrande បាននឹងកំពុងព្យាយាមដាក់លក់អគារ China Evergrande Centre កម្ពស់ ២៦ ជាន់របស់ខ្លួន នៅក្នុងសង្កាត់ Wan Chai ទីក្រុងហុងកុង បន្ទាប់ពីកិច្ចព្រមព្រៀងលក់តម្លៃ ១,៧ ពាន់លានដុល្លារ ត្រូវបានបរាជ័យ កាលពីឆ្នាំមុន ។
ប្រភពខាងលើបាននិយាយទៀតថា ប្រាក់ចំណូលពីការលក់អគារនៅហុងកុងនេះ នឹងត្រូវប្រើប្រាស់ ដើម្បីសងម្ចាស់បំណុលក្រៅប្រទេស ដែលជាផ្នែកមួយនៃការផែនការ ក្នុងការរៀបចំរចនាសម្ព័ន្ធបំណុលឡើងវិញ ខណ: Evergrande ត្រូវបានគេរំពឹងថានឹងប្រកាស នៅក្នុងសប្តាហ៍នេះ ។
មិនតែប៉ុណ្ណោះ ប្រភពដែលដឹងពីបញ្ហានេះ បានប្រាប់ទៅកាន់សារព័ត៌មាន Reuters ថា មានក្រុមហ៊ុនអភិវឌ្ឍន៍អចលនទ្រព្យហុងកុងជាច្រើន បានចូលរួមដាក់ពាក្យនៅក្នុងការដេញថ្លៃទិញយកអគារនេះ ។
ថ្មីនេះក្រុមហ៊ុន Evergrande បានជួលក្រុមហ៊ុនសេវាកម្មអចលនទ្រព្យ Cushman & Wakefield ធ្វើជាភ្នាក់ងារ ដើម្បីលក់អគារការិយាល័យរបស់ខ្លួនមួយនេះ ស្របពេលកាសែត Financial Times បានរាយការណ៍ថា កិច្ចព្រមព្រៀងលក់អគារនេះបានធ្លាក់ថ្លៃមកនៅត្រឹម ១,១៥ ពាន់លានដុល្លារប៉ុណ្ណោះ ពីតម្លៃដែលធ្លាប់បានប្រកាសលក់ ១,៧ ពាន់លានដុលារ កាលពីឆ្នាំមុន ។
ក្រុមហ៊ុនអចលនទ្រព្យ CK Asset ដែលបង្កើតឡើងដោយមហាសេដ្ឋីហុងកុង លោក Li Ka-shing បាននិយាយនៅក្នុងសេចក្តីថ្លែងការណ៍តាមអ៊ីមែលកាលពីថ្ងៃព្រហស្បតិ៍ថា ខ្លួនបានដាក់សំណើដេញថ្លៃសម្រាប់ទិញយកអគារ China Evergrande Centre នេះ ៕
