កាលពីថ្ងៃទី ២០ ធ្នូកន្លងទៅ មហាសេដ្ឋីអាមេរិក Elon Musk ទម្លាយថា លោកនឹងចុះចេញពីតំណែងជានាយកប្រតិបត្តិក្រុមហ៊ុន Twitter ភ្លាម បើសិនជាលោកអាចរកបានអ្នកមកអង្គុយកៅអីមួយនេះជំនួស។
“ខ្ញុំនឹងលាឈប់ពីតំណែងជា CEO ភ្លាមៗ ឲ្យតែខ្ញុំអាចរកបានអ្នកណាម្នាក់ដែលហ៊ានកាន់ការងារ បន្តពីខ្ញុំ ហើយបន្ទាប់ពីនោះខ្ញុំនឹងមើលការខុសត្រូវតែលើផ្នែកកម្មវិធី និងគ្រប់គ្រងផ្សេងៗប៉ុណ្ណោះ”។ នេះបើតាមការបង្ហោះសាររបស់មេធំ Tesla បានសរសេរលើ Twitter។
សូមជម្រាបដែរថា នេះគឺជាលើកដំបូងដែលមហាសេដ្ឋីអាមេរិក បង្ហើបពីការចង់លាលែងតំណែងជា CEO តាំងពីទិញក្រុមហ៊ុន Twitter ខណៈការប្រកាសនេះធ្វើឡើង ក្រោយលោកបង្ហោះសារសួរយោបល់អ្នកគាំទ្រថា លោកគួរតែបន្តកាន់តំណែងជា CEO ឬក៏គួរលាលែង។
បន្ថែមពីនោះ Elon Musk ក៏បានទទួលស្គាល់ដែរថា ការងាររបស់លោកមានច្រើនពេក ដូច្នេះលោកចាំបាច់ត្រូវរកបុគ្គល ដែលមានសមត្ថភាពសម្រាប់មើលការខុសត្រូវនៅ Twitter ជំនួស ប៉ុន្តែលោកអះអាងថា គ្មានអ្នកណាម្នាក់អាចកាន់ការងារមួយនេះ ក្រៅពីលោកឡើយ៕
