ថ្មីៗនេះ រដ្ឋាភិបាលឥណ្ឌូនេស៊ី កំពុងសម្លឹងរកការបង្កើតទីភ្នាក់ងារថ្មីមួយ ដើម្បីជំរុញឱ្យមានការវិនិយោគផ្ទាល់ពីបរទេស (FDI) នៅក្នុងឧស្សាហកម្មថាមពលនុយក្លេអ៊ែរដំបូងរបស់ខ្លួន។ នេះបើតាមការចុះផ្សាយពីសារព័ត៌មាន VNA ។
លោក Rohadi Awaludin ប្រធានផ្នែកស្រាវជ្រាវនុយក្លេអ៊ែរ ប្រចាំនៅទីភ្នាក់ងារស្រាវជ្រាវ និងនវានុត្តន៍ជាតិ (BRIN) បាននិយាយថា ក្រុមប្រឹក្សាថាមពលជាតិ (DEN) កំពុងតែធ្វើការរៀបចំបង្កើតអង្គភាពថ្មីមួយ ដើម្បីអភិវឌ្ឍរោងចក្រថាមពលនុយក្លេអ៊ែរនៅក្នុង ប្រទេសឥណ្ឌូនេស៊ី។
មិនតែប៉ុណ្ណោះ លោក Rohadi បាននិយាយទៀតថា បច្ចុប្បន្ន ប្រទេសឥណ្ឌូណេស៊ីមានទុនបំរុងអ៊ុយរ៉ាញ៉ូម ចំនួន ៩០ ០០០ តោន និងថូរីញ៉ូម ១៤០ ០០០ តោន ដែលវានឹងអាចគ្រប់គ្រាន់សម្រាប់ផ្គត់ផ្គង់ដល់រោងចក្រថាមពលនុយក្លេអ៊ែរ ចំនួន ១០ ហើយអាចមានសមត្ថភាពផលិតថាមពលបាន ១ ០០០ មេហ្គាវ៉ាត់ (MW) ក្នុងរោងចក្រនីមួយៗ សម្រាប់រយៈពេល ៣០ ឆ្នាំ។
លើសពីនេះ លោក Haendra Subekti នាយកគោលនយោបាយដំឡើងនុយក្លេអ៊ែរ និងសម្ភារៈ នៅទីភ្នាក់ងារគ្រប់គ្រងថាមពលនុយក្លេអ៊ែរឥណ្ឌូនេស៊ី (Bapeten) បាននិយាយផងដែរថា ប្រទេសដែលមានកម្មវិធីនុយក្លេអ៊ែរជឿនលឿន ដូចជាសហរដ្ឋអាមេរិក រុស្ស៊ី ជប៉ុន សាធារណរដ្ឋកូរ៉េ និងដាណឺម៉ាក សុទ្ធតែបង្ហាញចំណាប់អារម្មណ៍ ក្នុងការចូលរួមអភិវឌ្ឍគម្រោងថាមពលនុយក្លេអ៊ែរ នៅឥណ្ឌូនេស៊ី៕
