យោងតាមការចុះផ្សាយពី Downing Street បានបង្ហើបឲ្យដឹងថា នាយករដ្ឋមន្ត្រីអង់គ្លេស Rishi Sunak និងនាយករដ្ឋមន្ត្រីជប៉ុន Fumio Kishida នឹងធ្វើការចុះហត្ថលេខាលើកិច្ចព្រមព្រៀងការពារជាតិដ៏ថ្មីស្រឡាង អំឡុងពេលថ្នាក់ដឹកនាំទាំង ២ ជួបពិភាក្សាគ្នានៅទីក្រុងឡុងដ៍។
កិច្ចព្រមព្រៀងមួយនេះ នឹងធ្វើឡើងឡើងនៅអគារប្រវត្តិសាស្ត្រ Tower of London ហើយវានឹងអនុញ្ញាតឲ្យកងកម្លាំងអង់គ្លេស អាចធ្វើការចេញចូលប្រទេសជប៉ុនបាន ខណៈអង់គ្លេសទម្លាយថា នេះគឺជាកិច្ចព្រមព្រៀងការពារជាតិដ៏សំខាន់រវាងប្រទេសទាំង ២ ក្នុងរយៈពេលច្រើនជាង ១ សតវត្ស។
បន្ថែមពីការចុះហត្ថលេខាលើកិច្ចព្រមព្រៀងដ៏ធំខាងលើ ថ្នាក់ដឹកនាំទាំង ២ រូបក៏នឹងពិភាក្សាគ្នាអំពីបច្ចុប្បន្នភាពនៃការធ្វើជាម្ចាស់ផ្ទះកិច្ចប្រជុំកំពូល G7 របស់ជប៉ុន និងប្ដេជ្ញាចិត្តរក្សាជំនួយដល់ប្រទេសអ៊ុយក្រែនផងដែរ។
សូមជម្រាបដែរថា នាយករដ្ឋមន្ត្រីជប៉ុនបានចាកចេញពីប្រទេសតាំងពីថ្ងៃច័ន្ទ ដោយបានធ្វើដំណើរទៅកាន់សហភាពអឺរ៉ុប និងអាមេរិកខាងជើង ដើម្បីជួបសំណេះសំណាល ក៏ដូចជាពង្រឹងទំនាក់ទំនងរវាងសមាជិក G7 ហើយគ្រោងនឹងបញ្ចប់ដំណើរទស្សនកិច្ចនាថ្ងៃសុក្រ បន្ទាប់ពីជួបពិភាក្សាជាមួយប្រធានាធិបតីអាមេរិក ចូ បៃឌិន៕
