អតីតប្រធាន Formula One លោក Bernie Ecclestone ត្រូវបានប៉ូលិសឃុំខ្លួននៅអាកាសយានដ្ឋានរបស់ប្រទេសព័រទុយហ្គាល់ កាលពីថ្ងៃទី៧ ខែកញ្ញា ហើយត្រូវបានដោះលែងវិញជាច្រើនម៉ោងក្រោយមក ពីបទកាន់កាប់អាវុធ។ នេះបើតាមការចុះផ្សាយពីសារព័ត៌មាន AP។
លោក Ecclestone វ័យ ៩៥ឆ្នាំ បានមកដល់អាកាសយានដ្ឋាន Tires ជិតទីក្រុង Lisbon ជាកន្លែងដែលមន្ត្រីមកពីផ្នែកអាកាសយានដ្ឋាន បានរកឃើញកាំភ្លើងខ្លីមួយដើមនៅតាមខ្លួនរបស់លោក និងមិនមានឯកសារបញ្ជាក់ច្បាស់លាស់។
យ៉ាងណាមិញ នៅក្នុងបទសម្ភាសជាមួយសារព័ត៌មាន Daily Mail លោក Ecclestone បានសារភាពថាលោកបានយកកាំភ្លើងនេះមកពីប្រទេសស្វីស សម្រាប់បាញ់សត្វព្រាបប៉ុណ្ណោះ។
លោក Ecclestone បាននិយាយទៀតថា ក្រុមប៉ូលិសបានឃាត់ខ្លួន និងសាកសួរលោកអស់រយៈពេលជាច្រើនម៉ោង ដោយសារតែលោកមិនមានឯកសារបញ្ជាក់ច្បាស់លាស់ ប៉ុន្តែក្រោយមកក្រុមការងាររបស់លោកបានដោះស្រាយបញ្ចប់បញ្ហានេះវិញ។
ជម្រាបជូនថា នេះមិនមែនជាលើកទីមួយទេដែលលោក Ecclestone ជួបបញ្ហាដោយសារកាន់អាវុធនៅអាកាសយានដ្ឋាន។ កាលពីខែឧសភា ឆ្នាំ២០២២ លោកក៏ធ្លាប់ត្រូវបានឃុំខ្លួននៅអាកាសយានដ្ឋាន Viracopos ក្នុងប្រទេសប្រេស៊ីល បន្ទាប់ពីប៉ូលីសបានរកឃើញកាំភ្លើងខ្លីនៅតាមខ្លួនរបស់លោកផងដែរ។ ពេលនោះ លោកគ្រាន់តែត្រូវបង់ប្រាក់ពិន័យ ហើយអាចចាកចេញពីព្រលានយន្តហោះដោយគ្មានបញ្ហាបន្ថែមទៀត៕
