កាលពីចុងខែមករាកន្លងទៅ សហរដ្ឋអាមេរិកបានអះអាងថា រុស្ស៊ីមិនគោរពតាមសន្ធិសញ្ញា New START ដែលជាសន្ធិសញ្ញានុយក្លេអ៊ែរចុងក្រោយរវាងប្រទេសមហាអំណាចទាំង ២ ស្របពេលសង្គ្រាមនៅអ៊ុយក្រែនកំពុងមានសភាពក្ដៅគគុក។ នេះបើតាមការចុះផ្សាយពី CNA។
“រុស្ស៊ីមិនបានគោរពតាមគោលការណ៍សន្ធិសញ្ញា New START ដើម្បីជួយសម្រួលដល់សកម្មភាពអធិការកិច្ចនៅលើទឹកដីរបស់ពួកគេឡើយ។ ពួកគេមានវិធីសាស្ត្រច្បាស់លាស់ក្នុងការវិលមកអនុលោមច្បាប់នេះសារថ្មី ដោយគ្រាន់តែអនុញ្ញាតឲ្យមានការត្រួតពិនិត្យនៅទឹកដីរបស់ពួកគេ និងជួបគ្នាក្នុងសម័យប្រជុំនៃគណៈកម្មការប្រឹក្សាទ្វេភាគី”។ នេះបើតាមសម្ដីអ្នកនាំពាក្យក្រសួងការបរទេសអាមេរិកបាននិយាយ។
គួររំលឹកដែរថា កាលពីដើមខែសីហារដ្ឋាភិបាលទីក្រុងមូស្គូបានប្រកាសថា ពួកគេបានផ្អាកការអង្កេតពីសហរដ្ឋអាមេរិក សម្រាប់ការត្រួតពិនិត្យទីតាំងយោធារបស់ពួកគេ ក្រោមសន្ធិសញ្ញា New START និងបានបញ្ជាក់ថា អាមេរិកជាអ្នករារាំងការត្រួតពិនិត្យរបស់រុស្ស៊ីមុន។
ប៉ុន្តែអាមេរិកបានចេញមុខច្រានចោលការចោទប្រកាន់ខាងលើ និងបានអះអាងថា ពួកគេគ្មានហេតុផលដែលរារាំងមិនឲ្យរុស្ស៊ីចុះអង្កេតមើលទីតាំងយោធាអាមេរិកឡើយ។
សូមជម្រាបដែរថា សន្ធិសញ្ញានុយក្លេអ៊ែរ New START ត្រូវបានចុះកិច្ចព្រមព្រៀងរវាងមេដឹកនាំមហាអំណាចទាំង ២ កាលពីថ្ងៃទី ០៨ មេសា ២០១០ ដាក់ឲ្យប្រើប្រាស់នៅថ្ងៃទី ០៥ កុម្ភៈ ២០១១ និងមានសុពលភាពរហូតដល់ថ្ងៃទី ០៥ កុម្ភៈ ២០២៦៕
