សហរដ្ឋអាមេរិក កំពុងត្រៀមជជែកជាមួយសម្ព័ន្ពមិត្តជិតស្និទ្ធមួយចំនួន ក្នុងការត្រៀមកញ្ចប់ទណ្ឌកម្មសេដ្ឋកិច្ចទៅលើប្រទេសចិន បើសិនជាមហាអំណាចអាស៊ី ហ៊ានផ្គត់ផ្គង់សព្វាវុធទៅកាន់ប្រទេសរុស្ស៊ី។ នេះបើតាមការបង្ហើបឲ្យដឹងពីមន្ត្រីអាមេរិក ៤ រូប។
ដោយឡែក Reuters ក៏បានរាយការណ៍បន្ថែមទៀតថា សំណើខាងលើនេះបច្ចុប្បន្នគឺស្ថិតនៅដំណាក់កាលតំបូងនៅឡើយ ប៉ុន្តែអាមេរិកទំនងនឹងទាក់ទងទៅក្រុម G7 ដើម្បីរារាំងចិន មិនឲ្យលូកដៃក្នុងសង្គ្រាមនៅអ៊ុយក្រែនបាន។
មិនទាន់មានព័ត៌មានផ្លូវការណាមួយបញ្ជាក់ច្បាស់ពីកញ្ចប់ទណ្ឌកម្មសេដ្ឋកិច្ច ដែលអាមេរិកចង់ដាក់គម្រាមចិននៅឡើយ ស្របពេលកិច្ចសន្ទនាទាំងនោះមិនត្រូវបានបង្ហើបឲ្យដឹងជាសាធារណៈនោះទេ។
គួររំលឹកដែរថា កន្លងមកអាមេរិកធ្លាប់ព្រមានចិនជាញឹកញយកុំឲ្យចូលដៃជាមួយរុស្ស៊ី និងព្យាយាមឲ្យមហាអំណាចសេដ្ឋកិច្ចធំបំផុតទី ២ ដាក់ទណ្ឌកម្មលើរុស្ស៊ីថែមទៀត ប៉ុន្តែមហាអំណាចអាស៊ីមិនយល់ព្រមតាមសំណើលោកខាងលិចឡើយ ដោយអះអាងថាពួកគេនឹងឈរនៅចំណុចអព្យាក្រឹត្យ មិនលូកដៃក្នុងបញ្ហារវាងអ៊ុយក្រែន និងរុស្ស៊ីនោះទេ៕
