លែងទុកមុខអោយ លោក ស៊ី ជិនពីង រិះគន់អាមេរិកចំៗបញ្ហាចង់រារាំងសេដ្ឋកិច្ចចិន

អន្តរជាតិ

កាលពីពេលថ្មីៗនេះ ប្រធានាធិបតីចិន ស៊ី ជិនពីង បាន​ធ្វើការ​ថ្កោលទោសចំៗចំពោះសហរដ្ឋ​អាមេរិក ជុំវិញបញ្ហាចង់រារាំងលើការអភិវឌ្ឍន៍សេដ្ឋកិច្ចចិន និងប្ដេជ្ញាថា សម្រាប់អាណត្តិទី ៣ នេះ លោកនឹងតតាំងជាមួយអាមេរិកឲ្យអស់ពីសមត្ថភាព។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

យោងតាមការចុះផ្សាយពី NYtimes បានឲ្យដឹងថា កន្លងមកលោក ស៊ី មិនដែលធ្វើការ​រិះគន់​ចំៗ​បែបនេះទៅលើ​សហរដ្ឋអាមេរិកឡើយ ដោយគ្រាន់តែបញ្ឆិតបញ្ឆៀងប៉ុណ្ណោះ ប៉ុន្តែសារនេះ​លោក​និយាយចំៗតែម្ដង។

“ប្រទេសលោកខាងលិចដឹកនាំដោយសហរដ្ឋអាមេរិក បានព្យាយាមបិទច្រកសេដ្ឋកិច្ចចិនគ្រប់​ទិសទី ដែលធ្វើឲ្យពួកយើងមានផលវិបាកជាខ្លាំង​ក្នុងការ​អភិវឌ្ឍន៍ប្រទេស”។ នេះបើតាមសម្ដីប្រធានាធិបតីចិន​បាន​និយាយ។

គួររំលឹកដែរថា កន្លងមកចំណងមិត្តភាពរវាងមហាអំណាចសេដ្ឋកិច្ចពិភពលោក​ទាំង ២ មិនសូវជា​មាំទាំ​ប៉ុន្មានឡើយ ប៉ុន្តែក្រោយជំនួបរវាង​មេដឹកនាំ​ចិន និងអាមេរិក​កាលពីខែវិច្ឆិកា ស្ថានការណ៍កាន់តែតឹងតែង ជាពិសេសក្រោយអាមេរិកចោទចិនបង្ហោះបាឡុងចារកម្ម​ចូលដែនអាកាស​របស់ខ្លួន។

ទន្ទឹមនឹងនោះ រដ្ឋមន្ត្រីការបរទេសចិន Qin Gang ក៏បានគាំទ្រចំពោះការលើកឡើងរបស់​ប្រធានាធិបតីចិន ដោយបញ្ជាក់ថា ចិនមានសិទ្ធគ្រប់គ្រាន់ក្នុងការ​ថ្កោលទោសចំពោះទង្វើ​ ដែលអាមេរិក​ធ្វើមកលើខ្លួន។

“សហរដ្ឋអាមេរិកចង់ឲ្យចិនសំងំស្ងៀម បើទោះជាពួកគេវាយប្រហារ ឬប្រមាថបែបណា ប៉ុន្តែវាមិនអាចទៅរួចទេ។ បើសិនជាអាមេរិកនៅតែមិនបញ្ឈប់សកម្មភាពបែបនេះ បញ្ហាកាន់តែធំ​អាចនឹងផ្ទុះក៏ថាបាន”។ នេះបើតាមសម្ដីរដ្ឋមន្ត្រីការបរទេសចិនបានលើកឡើង។

សូមជម្រាបដែរថា ចិនទទួលរងគំនាបសេដ្ឋកិច្ចជាច្រើនពីអាមេរិក ជាពិសេសលើវិស័យពាណិជ្ជ​កម្ម​តាំងពីជំនាន់លោក ដូណាល់ត្រាំ នៅកាន់អំណាច ដូចជាតំឡើងពន្ធនាំចូលទំនិញពីចិន ខណៈជំនាន់​លោក ចូ បៃឌិន គឺទប់ស្កាត់ការនាំចូលបន្ទះឈីប និងឧបករណ៍ផលិតឈីប រារាំងការអភិវឌ្ឍន៍លើវិស័យបច្ចេកវិទ្យាចិនជាដើម៕