យោងតាមលេខាធិការនៃនាយកដ្ឋានសេដ្ឋកិច្ច ផែនការ និងការអភិវឌ្ឍន៍របស់ហ្វីលីពីន លោក Arsenio Balisacan បាននិយាយថា ប្រទេសខ្លួនកំពុងរក្សាបាននូវកំណើនសេដ្ឋកិច្ចដ៏រឹងមាំ ហើយកំពុងស្ថិតនៅលើផ្លូវឆ្ពោះទៅមុខ ដើម្បីក្លាយជាប្រទេសមានទំហំសេដ្ឋកិច្ច ទ្រីលានដុល្លារនៅឆ្នាំ២០៥០។ នេះបើតាមការចុះផ្សាយពីសារព័ត៌មាន VNA។
ថ្លែងនៅក្នុងកិច្ចសន្ទនាសេដ្ឋកិច្ចហ្វីលីពីន នៅទីក្រុង Milan ប្រទេសអ៊ីតាលី លោក Balisacan បានគូសបញ្ជាក់អំពីដំណើរការសេដ្ឋកិច្ចដ៏រឹងមាំរបស់ហ្វីលីពីន ក៏ដូចជាគោលនយោបាយមិត្តភាពវិនិយោគិន និងចក្ខុវិស័យរយៈពេលវែងសម្រាប់មេដឹកនាំធុរកិច្ចអឺរ៉ុប និងអ្នកពាក់ព័ន្ធផ្នែកហិរញ្ញវត្ថុផ្សេងទៀត មកលើប្រទេសរបស់ខ្លួន។
តាមរយ:លក្ខណ:ទីផ្សារដ៏ទាក់ទាញ ក៏ដូចជាវឌ្ឍនភាពដ៏គួរឲ្យកត់សម្គាល់ក្នុងឋានៈជាប្រទេសដែលមានប្រាក់ចំណូលមធ្យមកំពុងអភិវឌ្ឍន៍ លោក Balisacan បានបង្ហាញក្តីរំពឹងថា ហ្វីលីពីនអាចនឹងឈានដល់ប្រទេសដែលមានសេដ្ឋកិច្ច ២ទ្រីលានដុល្លា នៅឆ្នាំ២០៥០។
ដោយបន្ថែមពីលើនេះ លោក Balisacan បានពន្យល់ថា ការផ្លាស់ប្តូរសេដ្ឋកិច្ចរបស់ហ្វីលីពីន នឹងត្រូវបានជំរុញដោយគំនិតផ្តួចផ្តើមដែលជំរុញកំណើនថ្មី ខណៈពេលដែលការពង្រឹងវិស័យដែលមានស្រាប់ ដោយមានការចូលរួមពីវិស័យឯកជន នឹងដើរតួនាទីយ៉ាងសំខាន់ ជាពិសេសក្នុងហេដ្ឋារចនាសម្ព័ន្ធ និងការវិនិយោគដែលនឹងផ្តល់អត្ថប្រយោជន៍យូរអង្វែង និងវិបុលភាពរួមគ្នា។
ជម្រាបជូនថា ជាមួយនឹងមូលដ្ឋានគ្រឹះម៉ាក្រូសេដ្ឋកិច្ចដ៏រឹងមាំ សន្ទុះកំណែទម្រង់ កម្លាំងពលកម្មវ័យក្មេង និងជំនាញ និងទីតាំងយុទ្ធសាស្ត្រ លោក Balisacan បានសង្កត់ធ្ងន់ថា ហ្វីលីពីន នឹងក្លាយជាដៃគូដ៏ល្អបំផុតសម្រាប់ប្រទេសនៅក្នុងតំបន់អាស៊ី និងនៅទូទាំងពិភពលោក៕
