ប្រធានាធិបតីអ៊ុយក្រែន Volodymyr Zelenskyy និងអគ្គលេខាធិការអង្គការសហប្រជាជាតិ Antonio Gurerres បានទាមទារឲ្យមានការបន្តកិច្ចព្រមព្រៀងជាមួយរុស្ស៊ី ដែលអនុញ្ញាតិឲ្យអ៊ុយក្រែននាំចេញគ្រាប់ធញ្ញជាតិតាមច្រកសមុទ្រខ្មៅ។
យោងតាមការចុះផ្សាយពី Thestraitstimes បានឲ្យដឹងថា ថ្នាក់ដឹកនាំអ៊ុយក្រែន បានជួបជជែកជាមួយលោក Guterres នៅទីក្រុងគៀវ និងសង្កត់ធ្ងន់ថា ច្រកនាំចេញធញ្ញជាតិតាមសមុទ្រខ្មៅ គឺពិតជាមានសារៈសំខាន់ដល់ពិភពលោក ខណៈមន្ត្រីជាន់ខ្ពស់ UN ក៏បញ្ចេញមតិដូចគ្នា ដោយអះអាងថា វាពិតជាសំខាន់ចំពោះសុវត្ថិភាព និងតម្លៃចំណីអាហារពិភពលោក។
គួររំលឹកដែរថា កិច្ចព្រមព្រៀងនាំចេញគ្រាប់ធញ្ញជាតិរវាងអ៊ុយក្រែន និងរុស្ស៊ីតាមច្រកសមុទ្រខ្មៅ មានរយៈពេល ១២០ ចុះកាលពីខែកក្កដា និងបន្តជាថ្មីកាលពីខែវិច្ឆិកា នឹងត្រូវបន្តម្ដងទៀតនាថ្ងៃទី ១៨ មីនា បើសិនជាភាគីទាំងសងខាងគ្មានការជំទាស់។
យ៉ាងណា ភាគីរុស្ស៊ីអាចនឹងមិនឯកភាព ដ្បិតតម្រូវការដែលពួកគេទាមទារនៅមិនទាន់មានការយល់ព្រមនៅឡើយ ខណៈតួកគីដែលដើរតួជាអ្នកនាំពាក្យកំពុងខិតខំជាខ្លាំង ដើម្បីអាចឲ្យកិច្ចព្រមព្រៀងមួយនេះនៅបន្តទៅមុខបាន។
សូមជម្រាបដែរថា រុស្ស៊ីទាមទារឲ្យមានការដកចេញនូវទណ្ឌកម្មសេដ្ឋកិច្ច ដែលរារាំងដល់ការនាំចេញផលិតផលកសិកម្មរបស់ខ្លួន មុនពេលចុះកិច្ចព្រមព្រៀងបើកច្រកសមុទ្រខ្មៅឲ្យអ៊ុយក្រែនបន្តទៀត៕
