លោកឧកញ៉ាបណ្ឌិត គីម ហ៊ាង បានបង្ហើបឱ្យដឹងថា ការនាំយកក្រុមហ៊ុនអាមេរិក KW មកកម្ពុជា គឺលោកដឹងច្បាស់ថានឹងខាត តែលោកនៅតែយកមក ពីព្រោះលោកស្រឡាញ់វិស័យដីធ្លី និងស្រឡាញ់ស្រុកខ្មែរ ជាពិសេសដើម្បីបង្រៀន និងបណ្ដុះបណ្ដាលបន្ថែមដល់ភ្នាក់ងារលក់អចលនទ្រព្យនៅខ្មែរយើង ឱ្យមានចំណេះជំនាញកាន់តែច្បាស់ សម្រាប់អភិវឌ្ឍន៍សមត្ថភាពខ្លួនឯង សង្គម និងប្រទេសជាតិ។
លោកឧកញ៉ាបណ្ឌិត បានលើកឡើងក្នុងវីដេអូឃ្លីបមួយ យ៉ាងដូច្នេះថា ប្រទេសដែលរីកចម្រើន គឺគេគោរពច្បាប់ គេបង់ពន្ធ ហើយនៅក្នុងប្រព័ន្ធ KW អ្នកណាចូល គឺដឹងច្បាស់ថាត្រូវគោរពច្បាប់ និងបង់ពន្ធ។ សម្រាប់ KW ច្បាប់ និងពន្ធ មិនមានការគេចវេសសូម្បីមួយរៀល។ ការនាំយក KW មកកម្ពុជា ហាក់ពិបាករកស៊ីប្រកួតប្រជែងខ្លះដែរពីដំបូងៗ ព្រោះទាក់ទងនឹងកត្តាចូលរួម ការគោរពច្បាប់ និងការបង់ពន្ធ មួយចំនួនទៀតសោត ដែលប្រតិបត្តិករក្នុងវិស័យអចលនទ្រព្យខ្លះ មិនបានចូលរួមសហការជាមួយស្ថាប័នរដ្ឋ លើបញ្ហាកាតព្វកិច្ចបង់ពន្ធនេះ ឱ្យបានគ្រប់ជ្រុងជ្រោយនៅឡើយ។
លោកឧកញ៉ា បានបន្តថា ចុះនៅថ្ងៃក្រោយ ទោះយើងខាត ១០ឆ្នាំ តែកិច្ចសន្យាយើង ៤០ឆ្នាំ នៅពេលដែលច្បាប់ប្រទេសយើងរឹងមាំ ហើយគ្រប់គ្នាត្រូវតែបង់ពន្ធ ពេលនោះ KW នឹងជោគជ័យ។ ដូច្នេះការនាំយក KW មក ហេតុផលចំណេញគឺទី៣ ចំណែកឯទី១ គឺយើងចង់យករបៀបរកស៊ីរបស់អាមេរិក មកកាន់ស្រុកខ្មែរ ដើម្បីបង្រៀនខ្មែរឱ្យចេះធ្វើរឿងដែលត្រឹមត្រូវ សម្រាប់ខ្លួនឯង សង្គម និងប្រទេសជាតិ។ ចំណុចទី២ លោកគិតថា បើគ្មានយីហោរបស់អាមេរិកទេ ការរកស៊ីដោយខ្លួនឯង គឺពិបាកនឹងរីកចម្រើនបាន។
រយៈពេល ៤ឆ្នាំ មកនេះ KW Cambodia ខាត ប៉ុន្តែមិនមានបញ្ហានោះទេ ព្រោះលោកឧកញ៉ា បានព្យាករថា នឹងអាចខាតដល់រយៈពេល ១០ឆ្នាំ ឯណោះ។ ប្រធាន ស្ថាបនិកក្រុមហ៊ុន KW Cambodia ទូទាំងប្រទេសរូបនេះ បានបន្ថែមថា ក្រុមហ៊ុន មានលុយដើម្បីខាត ហើយទោះ ៤ឆ្នាំមកនេះ មិនចំណេញ ប៉ុន្តែលោកមានឱកាសរកស៊ីមុខរបរធំដុំជាច្រើន។ សព្វថ្ងៃនេះ KW បានជួយឱ្យយើងបង្កើតក្រុមការងារជាច្រើននៅតាមខេត្ត ក្នុងក្រុង និងមុខរបរផ្សេងៗទៀត ដែលបានមកពី KW។ អ្វីដែលជួយដល់យើងបន្ថែមទៀត គឺ បងប្អូនទាំងឡាយណា ដែលចូលក្នុងប្រព័ន្ធ KW ហើយ បើសិនជាគាត់ចង់ទៅលេងអាមេរិក គឺជាការងាយស្រួល។ ជាពិសេស បានបង្រៀនឱ្យយើងចេះនូវបច្ចេកវិទ្យាថ្មីៗបន្ថែមទៀត។
សូមជម្រាបជូនថា KW Cambodia គឺជាអាជីវកម្មមួយ ដែលលោកឧកញ៉ា គីម ហ៊ាង បានចុះហត្ថលេខាផ្តាច់មុខ រយៈពេល២០ឆ្នាំ បូក២០ឆ្នាំ ស្មើនឹង៤០ឆ្នាំ ហើយលោកបាននាំយកក្រុមហ៊ុនរបស់អាមេរិកមួយនេះ មកកម្ពុជា តាំងពីឆ្នាំ២០១៨។ KW Cambodia មកពីពាក្យពេញ Keller Williams Cambodia ដែលក្រុមហ៊ុនអាមេរិក Keller Williams Realty International បង្កើតឡើងដំបូង កាលឆ្នាំ១៩៨៣ ជាក្រុមហ៊ុនអចលនទ្រព្យ ប៉ុន្តែក្រោយមក ក្រុមហ៊ុននេះបានកែប្រែពីក្រុមហ៊ុនអចលនទ្រព្យ ទៅជាក្រុមហ៊ុនបច្ចេកវិទ្យាផ្នែកអចលនទ្រព្យវិញ៕
