លោកឧកញ៉ា ប៉ិច បូឡែន បានបន្តជាប់ឆ្នោតជាប្រធានសមាគមសហគ្រិនវ័យក្មេងកម្ពុជា អាណត្តិ ២០២៤-២០២៦ ក្នុងការបោះឆ្នោតជ្រើសតាំងក្រុមបឹ្រក្សាភិបាល អាណត្តិ ២០២៤-២០២៦ ស្ថិតនៅអគារកោះពេជ្រ រាជធានីភ្នំពេញ កាលពីថ្ងៃទី២៦ ខែឧសភា ឆ្នាំ២០២៣។
កម្មវិធី “សន្និបាតប្រចាំឆ្នាំ និងការបោះឆ្នោតជ្រើសតាំងក្រុមបឹ្រក្សាភិបាល អាណត្តិ ២០២៤ – ២០២៦” នារសៀលថ្ងៃទី២៦ ខែឧសភា ឆ្នាំ២០២៣ របស់សមាគមសហគ្រិនវ័យក្មេងកម្ពុជា ប្រារព្ធឡើងក្នុងគោលបំណងទី១ ធ្វើបច្ចុប្បន្នភាព រាយការណ៍អំពីវឌ្ឍនភាព ក៏ដូចជាដើម្បីអបអរសាទរភាពជោគជ័យ និងសមិទ្ធផលរបស់សមាគមសហគិនវ័យក្មេងកម្ពុជាកន្លងមក ជាពិសេសសមិទ្ធផលដែលសម្រេចបាននៅក្នុងឆ្នាំ២០២២ និងដើមឆ្នាំ២០២៣។ ជាក់ស្ដែង សមាគមបានដាក់ផែនការពង្រីកសាខាទៅកាន់ខេត្តផ្សេងទៀត ជាពិសេសខេត្តនៅតាមបណ្តាមាត់សមុទ្រ និងខេត្តមួយចំនួនដែលមានសក្តានុពលខ្ពស់ និងមានធុរកិច្ចច្រើន ពោលគឺសមាគមនឹងបង្កើតសាខាឱ្យបានគ្រប់ខេត្ត ទូទាំងប្រទេសកម្ពុជានៅត្រឹមឆ្នាំ២០២៦។
រីឯគោលបំណងដ៏សំខាន់ទី២ គឺការបោះឆ្នោតជ្រើសតាំងប្រធានសមាគមសហគ្រិនវ័យក្មេងកម្ពុជាជាផ្លូវការ និងក្រុមប្រឹក្សាភិបាលថ្មីសម្រាប់អាណត្តិ ២០២៤ – ២០២៦។ ជាលទ្ធផល សមាសភាពប្រធានសមាគមថ្មីជាផ្លូវការ គឺឧកញ៉ា ប៉ិច បូឡែន និងសមាសភាពក្រុមប្រឹក្សាភិបាលសម្រាប់អាណត្តិថ្មី ២០២៤ – ២០២៦ ចំនួនបួនរូប ដែលត្រូវបានជាប់ឆ្នោត រួមមានលោកស្រី នុត ក្លារ៉ា នាយិកាប្រតិបត្តិក្រុមហ៊ុន Apsara Media Services (AMS) លោក ញ៉េប ទីណាល់ ប្រធាននិងនាយកសាលា THE CAMFIRST SCHOOL លោកស្រី ប៉ោ ជូ នាយិកាគ្រប់គ្រងក្រុមហ៊ុន Allcon Consulting Co., Ltd. និងលោក គឹម សុខអេង អគ្គនាយកក្រុមហ៊ុន Borey KC Co., Ltd.។
សូមជម្រាបថា ក្នុងពិធីសំណេះសំណាល និងលៀងសាយភោជន៍របស់សមាគមសហគ្រិនវ័យក្មេងកម្ពុជា នៅមជ្ឍមណ្ឌលសន្និបាត និងពិព័រណ៍កោះពេជ្រ កាលពីល្ងាចថ្ងៃទី២៦ ខែឧសភា ឆ្នាំ២០២៣ ឯកឧត្តមបណ្ឌិត ហ៊ុន ម៉ាណែត បានចូលរួមអបអរសាទរចំពោះទំនាក់ទំនងយ៉ាងល្អប្រសើររវាងសហគ្រិនយុវជនវ័យក្មេងរបស់កម្ពុជា ដែលបានចងក្រងគ្នាបណ្តាញ និងបានរួមគ្នាកសាងសហគមន៍ធុរកិច្ច ដើម្បីជំរុញមុខជំនួញរបស់ខ្លួនផង និងបានបង្កើតឱកាសការងារគ្រប់កម្រិត និងជំនាញសម្រាប់ប្រជាជនកម្ពុជាជាច្រើនពាន់ម៉ឺននាក់។
សមាគមសហគ្រិនវ័យក្មេងកម្ពុជា ត្រូវបានបង្កើតឡើង នៅឆ្នាំ២០០៩ ហើយក្នុងរយៈពេលត្រឹម ១៤ឆ្នាំ សមាគមបានពង្រីកសមាជិកកើនដល់ ៥៤៦នាក់ មកពីវិស័យផ្សេងៗគ្នា និងមានការបង្កើតសាខានៅតាមបណ្តារាជធានី-ខេត្តជាបន្តបន្ទាប់ ដើម្បីបម្រើឱ្យការពង្រឹង និងពង្រីកសក្តានុពលនៃអាជីវកម្មផង និងជាពិសេសបានរួមគ្នាដោះស្រាយនូវបញ្ហាប្រឈម ដើម្បីការពារផលប្រយោជន៍របស់សហគ្រិន រួមទាំងសហគ្រាសធុនតូច និងមធ្យម ក៏ដូចជាធុរកិច្ចថ្មី ដែលជាដៃគូយ៉ាងសំខាន់របស់រាជរដ្ឋាភិបាល ក្នុងការរួមដំណើរបោះជំហានឆ្ពោះទៅរកវិបុលភាពនិងការអភិវឌ្ឍ ដែលផ្តោតទៅលើការបែងចែកផលលាភប្រកបដោយសមធម៌ សម្រាប់ប្រជាជនគ្រប់ៗគ្នា៕
