អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា ស្ថានភាពសេដ្ឋកិច្ចកម្ពុជា សម្រាប់អាណត្តិថ្មីនេះ នឹងកាន់តែប្រសើរឡើងបន្ថែមទៀត ដោយសារថ្នាក់ដឹកនាំភាគច្រើនសុទ្ធសឹងតែជាបញ្ញវន្តវ័យក្មេង មានចំណេះដឹងខ្ពង់ខ្ពស់ ច្បាស់លាស់ ដែលអាចដឹកនាំសេដ្ឋកិច្ចប្រទេសកម្ពុជា ឱ្យទទួលបានកំណើនកាន់ខ្ពស់។
អ្នកឧកញ៉ា លឹម ហេង ដែលជាអ្នកជំនាញសេដ្ឋកិច្ចមួយរូប បានឱ្យដឹងថា បច្ចុប្បន្នស្ថានភាពពិភពលោក កំពុងជួបប្រទះនូវបញ្ហាមួយចំនួនដូចជា កូវីដ-១៩ ការប្រែប្រួលអាកាសធាតុ ព្រមទាំងសង្គ្រាមរវាងប្រទេសរុស្ស៊ី-អ៊ុយក្រែន ដែលធ្វើឱ្យប្រទេសជាច្រើនកំពុងជួបវិបត្តិសេដ្ឋកិច្ច។ ទោះយ៉ាងណា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី ប្រទេសកម្ពុជា បានគេចផុតពីវិបត្តិសេដ្ឋកិច្ចធ្ងន់ធ្ងរបាន ព្រមទាំងអាចធ្វើឱ្យមានកំណើនសេដ្ឋកិច្ចឡើងវិញ យ៉ាងឆាប់រហ័សទៀតផង។
យ៉ាងណាមិញ សម្រាប់អាណត្តិថ្មី ក្នុងនីតិកាលទី៧ ដែលឯកឧត្តមបណ្ឌិត ហ៊ុន ម៉ាណែត នឹងឡើងដឹកនាំធ្វើជានាយករដ្ឋមន្ត្រី នាពេលខាងមុខនោះ អ្នកឧកញ៉ា លឹម ហេង យល់ថា សេដ្ឋកិច្ចកម្ពុជា នឹងកាន់តែមានភាពល្អប្រសើរបន្ថែមទៀត ខណៈដែលថ្នាក់ដឹកនាំភាគច្រើនសុទ្ធតែជាបញ្ញវន្ត មានចំណេះដឹងខ្ពង់ខ្ពស់ ច្បាស់លាស់ ដែលមានប្រសិទ្ធភាពខ្ពស់ ក្នុងការបម្រើផលប្រយោជន៍ ដល់ប្រជាពលរដ្ឋទូទៅ ក៏ដូចជាអាជីវករ និងអ្នកជំនួញនានា ឱ្យកាន់តែមានភាពងាយស្រួលក្នុងការប្រកបអាជីវកម្ម អាចកាត់បន្ថយនូវភាពក្រីក្រ បង្កើនការអភិវឌ្ឍនៅតាមទីជនបទ បង្កើនប្រសិទ្ធិភាពនៃការនាំចេញ ជាពិសេស សហគ្រាសធនតូច និងមធ្យម (SME) របស់កម្ពុជាផងដែរ។
គួរបញ្ជាក់ថា កាលថ្ងៃទី២៦ ខែកក្កដា សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែងសារពិសេសទៅកាន់ជនរួមជាតិថា សម្តេចមិនបន្តតំណែងជានាយករដ្ឋមន្ត្រីទៀតទេ ហើយនឹងត្រូវជំនួសដោយឯកឧត្តមបណ្ឌិត ហ៊ុន ម៉ាណែត នឹងបន្តធ្វើជានាយករដ្ឋមន្ត្រី ចាប់ពីល្ងាចថ្ងៃទី២២ ខែសីហា ឆ្នាំ២០២៣ទៅ។ ជាមួយគ្នានោះ គណៈរដ្ឋមន្ត្រីថ្មីមួយ នឹងត្រូវបានរៀបចំឡើង ហើយភាគច្រើនសុទ្ធតែជាថ្នាក់ដឹកនាំវ័យក្មេង នឹងក្លាយជារដ្ឋមន្ត្រី នៅតាមក្រសួង ស្ថាប័ននានា ខណៈដែលឥស្សរជនជាន់ខ្ពស់ចាស់ៗមួយចំនួន នឹងត្រូវក្លាយជាសមាជិករដ្ឋសភា សមាជិកព្រឹទ្ធសភា ឬទីប្រឹក្សារាជរដ្ឋាភិបាល៕
