ឧកញ៉ា គីម ហ៊ាង ប្រធាន KW Cambodia និងជាអគ្គនាយកបុរី វិមានសំណាង យល់ឃើញថា ក្នុងស្ថានភាពបច្ចុប្បន្ននេះ កម្ពុជាគួរតែសម្លឹងមើលឱកាសទាក់ទាញវិនិយោគិន មកពីប្រទេសតំបន់អារ៉ាប់ ដែលជាប្រទេសចាយលុយធំជាងគេនៅប៉ុន្មានឆ្នាំចុងក្រោយនេះ ដើម្បីជួយជំរុញសេដ្ឋកិច្ចជាតិឱ្យប្រសើរឡើងវិញ ជាពិសេសលើវិស័យដីធ្លី។
លោកឧកញ៉ា បានលើកឡើងក្នុងបទសម្ភាសន៍មួយកាលពីពេលថ្មីៗនេះថា យើងបានឆ្លងកាត់ដំណាក់កាលលំបាកបំផុតរួចហើយ ដូច្នេះដំណោះស្រាយនាពេលបច្ចុប្បន្ន លោកសូមសំណូមពរដល់ថ្នាក់ដឹកនាំរាជរដ្ឋាភិបាល អ្វីដែលសេដ្ឋកិច្ចកម្ពុជាត្រូវការ អ្វីដែលវិស័យដីធ្លីត្រូវការ គឺទុនវិយោគពីបរទេស។ យើងមិនអាចរំពឹងត្រឹមតែចិននោះទេ អ្វីដែលយើងគួរធ្វើគឺត្រូវទាក់ទាញអ្នកវិនិយោគមកពីគ្រប់ប្រទេស ដូចជាវិនិយោគិនមកពី ជប៉ុន កូរ៉េខាងត្បូង អឺរ៉ុប អាម៉េរិក ជាដើម។ ជាពិសេស ប្រទេសដែលចាយលុយធំជាងគេក្នុងឆ្នាំ២០២២ និងឆ្នាំ២០២៣ គឺប្រទេសតំបន់អារ៉ាប់។
ស្ថាបនិក KW Cambodia ទូទាំងប្រទេស បានបន្ថែមដូច្នេះថា៖ “នៅមជ្ឈិមប្រទេស គឺជាប្រទេសដែលមានលុយមហាសាល។ គ្រាន់តែមានបរទេសទម្លាក់លុយជាង ១០ពាន់លានដុល្លារ នៅខេត្តព្រះសីហនុ ក្នុងរយៈពេល៣ឆ្នាំ វិស័យដីធ្លីនៅស្រុកខ្មែររីកចម្រើនដូចផ្ការីក។ ខ្ញុំមើលឃើញ បើសិនជាយើងអាចទាក់ទាញចិនផង កូរ៉េ ជប៉ុន អឺរ៉ុប អាស៊ាន និងប្រទេសតំបន់អារ៉ាប់ផង ឬបើសិនប្រទេសអារ៉ាប់ ទម្លាក់លុយវិនិយោគ ២០ពាន់លានដុល្លារនៅកម្ពុជាក្នុងឆ្នាំ២០២៤ នោះសេដ្ឋកិច្ចកម្ពុជា នឹងអាចល្អដូចឆ្នាំ២០១៩។ យើងត្រូវការតែលុយបរទេសប្រហែល ២០ពាន់លានដុល្លារ ហើយលុយទាំង២០ពាន់លាននេះ វានឹងសាយភាយគ្រប់ផ្នែក ក្លាយជារាប់សិប រាប់រយពាន់លានដុល្លារ នោះសេដ្ឋកិច្ចជាតិយើងនឹងដំណើរការប្រសើរឡើងវិញ”។
សូមជម្រាបថា បើតាមលោក ជា វុទ្ធី មន្ត្រីជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជា (CDC) ធ្លាប់បានឱ្យដឹងកាលពីថ្ងៃទី១១ ខែសីហា ឆ្នាំ២០២៣ថា ការវិនិយោគផ្ទាល់ពីបរទេស (FDI) នៅកម្ពុជា គឺការវិនិយោគពីប្រទេសចិន មានអត្រាខ្ពស់ជាងគេ ដោយមានអត្រា ៤២,១ ភាគរយ, ថៃ ១,០៩ ភាគរយ, ជប៉ុន ០,៩៨ ភាគរយ, កោះកៃម៉ាន ០,៥២ ភាគរយ, កោះសាម័រ ០,៥០ ភាគរយ, កូរ៉េខាងត្បូង ០,៤៥ ភាគរយ, អង់គ្លេស ០,៣២ ភាគរយ, សិង្ហបុរី ០,៣១ ភាគរយ, និងម៉ាឡេស៊ី ០,១៩ ភាគរយ ខណៈដែលប្រទេសតំបន់អារ៉ាប់នៅមជ្ឈិមបូព៌ា មានតិចតូចនៅឡើយ៕
