ឧកញ៉ា ហេង វ៉ាន់ដា ប្រធានក្រុមប្រឹក្សាភិបាលវិទ្យាស្ថានវ៉ាន់ដាគណនេយ្យ នៅព្រឹកថ្ងៃចន្ទ ទី១៩ ខែកុម្ភៈនេះ បានចែករំលែកពីគន្លឹះសំខាន់មួយចំនួន ដើម្បីទទួលបាន «តម្លៃបន្ថែម (ValueAdded)» សម្រាប់សហគ្រាស ស្ថាប័ន ឬអង្គភាព។
លោកឧកញ៉ា បានបង្ហោះសារលើទំព័រហ្វេសប៊ុករបស់ខ្លួន នៅព្រឹកនេះ លើចំណុច៤យ៉ាងអំពី តម្លៃបន្ថែម(ValueAdded) មានដូចជា៖ ១)សហគ្រាស/ស្ថាប័ន/អង្គភាព ត្រូវតែរៀបចំប្រព័ន្ធគ្រប់គ្រងឱ្យល្អរឹងមាំ ដើម្បីអនុវត្តតាមផែនការយុទ្ធសាស្ត្រ។ ២)បើសហគ្រាស/ស្ថាប័ន/អង្គភាព មានលក្ខណៈដូចខាងលើ រួចមានសវនករផ្ទៃក្នុងខ្លាំង អាចនឹងទទួលបានបន្ថែមនូវតម្លៃបន្ថែម(ValueAdded) ទៀត។ ៣)បើសហគ្រាស/ស្ថាប័ន/អង្គភាព មានលក្ខណៈដូចខាងលើ និងមានបន្ថែមតម្លៃរួចហើយដោយសវនកម្មផ្ទៃក្នុង ហើយបើចង់បន្ថែមទៀត អាចមានសវនករផ្ទៃក្រៅជួយបន្ថែមទៀតក៏បាន។ វាអាចនឹងជួយបន្ថែមទៀតនូវតម្លៃបន្ថែម។ ៤)នៅក្នុងពិភពលោក ស្ថាប័នដែលមានអភិបាលកិច្ចល្អ ចង់បានតម្លៃបន្ថែម គេគ្រាន់តែមានសវនករផ្ទៃក្នុងនិងក្រៅជាការស្រេច។
សូមជម្រាបថា ឧកញ៉ា ហេង វ៉ាន់ដា ជាស្ថាបនិកវិទ្យាស្ថានវ៉ាន់ដាគណនេយ្យ និងជាប្រធានក្រុមប្រឹក្សាភិបាលរបស់សមាគមគ្រឹះស្ថានឧត្តមសិក្សាកម្ពុជា ចំនួន ៣អាណត្តិ ចាប់ពីឆ្នាំ២០១៨ បន្ទាប់ពីកាលខែមករា កន្លងទៅថ្មីៗនេះ លោកបានបន្តទទួលបានសេចក្តីទុកចិត្តពីសមាជិក សមាជិកា បោះឆ្នោតឱ្យលោកជាប់ជាប្រធានក្រុមប្រឹក្សាភិបាលរបស់សមាគមគ្រឹះស្ថានឧត្តមសិក្សាកម្ពុជា សម្រាប់អាណត្តិថ្មី ឆ្នាំ២០២៤-២០២៦ ជាបន្តទៀត៕
