លោកជំទាវឧកញ៉ា ខុង លីស៊ីអាណា ម្ចាស់ក្រុមហ៊ុន ឌីអិនជី គ្រុប (D N G Group) ម្តាយរបស់លោក ឌួង ឆាយ អគ្គនាយកក្រុមហ៊ុន Downtown Development បានបរិច្ចាគផ្ទះមួយល្វែង ក្នុងបុរី អេច អិល (Borey HL) ដល់អង្គការ អាង ស័ង អ៊ីន វី (UN SOIN UNE VIE au Cambodge) ធ្វើជាទីស្នាក់ការកណ្តាល សម្រាប់ព្យាបាលជូនប្រជាពលរដ្ឋក្រីក្រ និងក្មេងៗពិការគ្មានលទ្ធភាពព្យាបាល ដោយឥតបង់ប្រាក់។
![](https://www.oknha.news/wp-content/uploads/2024/05/photo_2023-12-01_04-52-30-682x1024.jpg)
ផ្ទះមួយល្វែង ចំនួន៤ជាន់ ដែលលោកជំទាវឧកញ៉ា ខុង លីស៊ីអាណា បរិច្ចាគនេះ គឺផ្ទះលេខ B17 ក្នុងបុរី អេច អិល ស្ថិតនៅភូមិ២៤ សង្កាត់ព្រៃសរ ខណ្ឌដង្កោរ រាជធានីភ្នំពេញ តាមបណ្តោយផ្លូវសន្តិភាព។
![](https://www.oknha.news/wp-content/uploads/2024/05/photo_2024-05-10_10-02-05-768x1024.jpg)
លោកជំទាវឧកញ៉ា ខុង លីស៊ីអាណា បានថ្លែងប្រាប់ដល់ ឧកញ៉ាញូស៍ ឱ្យដឹងថា ការបរិច្ចាគខាងលើនេះ គឺដោយសារលោកជំទាវយល់ឃើញថា អង្គការមួយនេះបានជួយដល់កុមារជាច្រើននៅកម្ពុជា។ ក្នុងនាមលោកជំទាវជាប្រជាពលរដ្ឋមួយរូប ពិតជាសប្បាយចិត្តនៅពេលឃើញពួកគាត់ជាអ្នករស់នៅបរទេស ឆ្លៀតពេលវិសមកាលម្តងៗ តែងតែប្រមូលសមាជិកមកជួយដល់ខ្មែរយើងដល់ជនបទ ឬតំបន់ដាច់ស្រយាលពីទីក្រុងរាប់រយគីឡូម៉ែត្រ ក៏ពួកគាត់ព្យាយាមមកជួយខ្មែរយើង។ នេះហើយជាក្តីស្រឡាញ់ ការចែករំលែក ហើយយើងចង់ឃើញប្រជាពលរដ្ឋយើង តែងតែមានអ្នកជួយ។
លោកជំទាវឧកញ៉ា បានបន្ថែមទាំងអួលដើមកថា៖ “នៅពេលយើងមានលុយយើងអាចរកពេទ្យផ្សេងៗបាន ប៉ុន្តែសម្រាប់អ្នកគ្មានលទ្ធភាព អ្នកអត់ តើគ្នាទៅរកពេទ្យនៅទីណា។ នេះហើយជាទឹកចិត្ត នៅពេលខ្ញុំឃើញហើយ ខ្ញុំអាណិត ខ្ញុំស្ម័គ្រចិត្តថាខ្ញុំនឹងជួយជាទីស្នាក់ការសម្រាប់ពួកគាត់ ដែលជាកត្តាចាំបាច់បំផុតសម្រាប់ការព្យាបាលជូនប្រជាពលរដ្ឋយើងទាំងអស់គ្នាបានទាន់ពេលវេលា ដូចជាក្មេងៗគាត់ក្រ មិនមានលុយទៅព្យាបាល ក្មេងៗខ្លះគាត់ឆែបមាត់ ត្រចៀកថ្លង់ ត្រូវការវះកាត់ និងមានច្រើនរូបភាពដែលខ្ញុំមើលឃើញ។ ការបរិច្ចាគនេះ ជាក្តីស្រឡាញ់និងជាការចែករំលែក”។
![](https://www.oknha.news/wp-content/uploads/2024/05/428675808_122127187976144000_5414373468686087348_n-1024x576.jpg)
សូមជម្រាបថា នេះមិនមែនលើកទីមួយទេ ដែលលោកជំទាវឧកញ៉ា ខុង លីស៊ីអាណា ចូលរួមបរិច្ចាគធនធានផ្ទាល់ខ្លួនជួយដល់សង្គម។ កន្លងមក លោកជំទាវឧកញ៉ា ក៏តែងតែចូលរួមបរិច្ចាគជូនកាកបាទក្រហម និងបរិច្ចាគជូនរាជរដ្ឋាភិបាលក្នុងសកម្មភាពសប្បុរសធម៌ផ្សេងៗ។ តាមរយៈការបរិច្ចាគធនធានផ្ទាល់ខ្លួនជាហូរហែមកនេះ លោកជំទាវត្រូវបានព្រះមហាក្សត្រចេញព្រះរាជក្រឹត្យ ត្រាស់បង្គាប់ផ្តល់គោរមងារ «ឧកញ៉ា» កាលពីថ្ងៃទី២៧ ខែកក្កដា ឆ្នាំ២០២៣។
អង្គការ អាង ស័ង អ៊ីន វី ត្រូវបានបង្កើតឡើងដោយក្រុមគ្រូពេទ្យស្ម័គ្រចិត្តជនជាតិបារាំង និងបានជួយដល់ប្រជាពលរដ្ឋកម្ពុជា ចាប់ពីឆ្នាំ២០១៨។ កន្លងមក អង្គការមួយនេះ តែងសហការជាមួយ មន្ទីរសុខាភិបាលរាជធានី-ខេត្ត មន្ទីរពេទ្យបង្អែក រួមជាមួយគ្រូពេទ្យឯកទេស ដើម្បីចុះពិនិត្យ ព្យាបាល និងវះកាត់កុមារ ពិការភាពមុខមាត់ និងអវៈយវៈ ជូនប្រជាពលរដ្ឋដោយឥតបង់ប្រាក់៕
![](https://www.oknha.news/wp-content/uploads/2024/05/photo_2024-01-26_13-54-27-2-1024x1024.jpg)
![](https://www.oknha.news/wp-content/uploads/2024/05/1-4-1024x768.jpg)
![](https://www.oknha.news/wp-content/uploads/2024/05/2-5-768x1024.jpg)
![](https://www.oknha.news/wp-content/uploads/2024/05/3-5-768x1024.jpg)
![](https://www.oknha.news/wp-content/uploads/2024/05/4-5-1024x768.jpg)
![](https://www.oknha.news/wp-content/uploads/2024/05/5-4-768x1024.jpg)
![](https://www.oknha.news/wp-content/uploads/2024/05/6-4-1024x768.jpg)
![](https://www.oknha.news/wp-content/uploads/2024/05/photo_2023-07-21_10-25-09-1024x634.jpg)
![](https://www.oknha.news/wp-content/uploads/2024/05/photo_2023-07-01_08-23-43-576x1024.jpg)
![](https://www.oknha.news/wp-content/uploads/2024/05/photo_2023-08-11_20-18-28-683x1024.jpg)
![](https://www.oknha.news/wp-content/uploads/2024/05/photo_2023-09-16_15-15-01-652x1024.jpg)
![](https://www.oknha.news/wp-content/uploads/2024/05/photo_2024-05-10_09-28-55-1024x682.jpg)