លោកជំទាវ អ្នកឧកញ៉ា ម៉ៅ ចំណាន គិត ម៉េង បានលើកឡើងថា ការចំណាយពេលវេលាជាមួយមនុស្សជាទីស្រលាញ់ មិនមែនជារឿងខាតពេលទេ។ ទន្ទឹមនឹងនោះ លោកជំទាវ អ្នកឧកញ៉ា ក៏បានបង្ហាញគោលការណ៍៥ចំណុចដែលនាំឱ្យលោកជំទាវផ្សារភ្ជាប់ទំនាក់ទំនងទៅនឹងជីវិតគ្រួសារប្រចាំថ្ងៃ។
តាមរយៈសំណេរលើបណ្ដាញសង្គម អមដោយវីដេអូជួបជុំក្រុមគ្រួសារ កាលពីថ្ងៃទី៤ ខែមករា ឆ្នាំ២០២៦ លោកជំទាវ អ្នកឧកញ៉ា ម៉ៅ ចំណាន គិត ម៉េង បានឱ្យដឹងថា «ទទួលទានអាហារជាមួយគ្នា សន្ទនាជាមួយឪពុកម្ដាយអ្នកមានគុណ រីករាយជាមួយកូនៗយើង ទាំងអស់នេះគឺជាសុភមង្គលពិតក្នុងជីវិត។ នៅជាមួយមនុស្សជាទីស្រឡាញ់មិនមែនជាការខ្ជះខ្ជាយពេលវេលានោះទេ យ៉ាងណាមិញវាជាពេលវេលាដែលយើងវិនិយោគទៅលើអ្វីដែលមានតម្លៃឋិតឋេរលើសពីសមិទ្ធផលផ្សេងៗ»។
លោកជំទាវបន្ថែមថា «ទាំងនេះជាគោលការណ៍មួយចំនួនដែលជួយនាំនាងខ្ញុំផ្សារភ្ជាប់ទំនាក់ទំនងទៅនឹងជីវិតគ្រួសារប្រចាំថ្ងៃ៖
- លៃពេលសម្រាប់គ្រួសារ ឱ្យដូចជាការប្រជុំសំខាន់មួយដែរ។
- ទុករឿងស្មុគស្មាញ ស្ត្រេសចោលនៅខាងក្រៅ មុននឹងចូលផ្ទះ។
- អបអររីករាយនឹងពេលវេលាសាមញ្ញតូចៗដូចជាពេលនិយាយ ហូបនេះហូបនោះ ឬក៏ញញឹម។
- បង្ហាញវត្តមានពេញលេញ ដោយកាត់បន្ថយប្រើទូរសព្ទ បើកចិត្តទូលាយបង្កើនភាពស្និទ្ធស្នាលជាមួយគ្នា។
- រក្សាទម្លាប់គ្រួសារ ដូចជាការទទួលទានអាហារជុំគ្នា ជជែកគ្នាពេលល្ងាចជាដើម។
ជាមួយគ្នានោះ លោកជំទាវ អ្នកឧកញ៉ា ម៉ៅ ចំណាន ក៏បានសង្កត់ធ្ងន់ថា សូមបងប្អូនចាំថា ការងារយើងបង្ហាញថា «អ្វីយើងអាចធ្វើបាន» ប៉ុន្តែគ្រួសារយើងរំឭកយើងថា «ហេតុអ្វីដែលយើងត្រូវធ្វើ»៕
